گلگت (این این آئی)وزیراعظم پاکستان کے مشیر برائے امور کشمیر و گلگت بلتستان قمر زمان کائرہ نے کہا ہے کہ عمران خان کے وزیر خزانہ شوکت ترین نے ملک کیخلاف سازش کی، عمران خان آپ نے نفرت، گالی اور تقسیم کے سوا اور کیا دیا؟ ،سیلاب اور بارشوں سے تمام صوبے بشمول گلگت بلتستان متاثر ہوا ہے،
حالیہ سیلاب سے پورے پاکستان میں 1300 افراد جاں بحق ہوئے،وزیر اعظم نے لواحقین کے لیے فی کس10 لاکھ روپے امداد اور گلگت بلتستان کے لیے وزیر اعظم نے 3 ارب روپے کے امدادی پیکج کا اعلان کیا ہے،متاثرہ علاقوں کے سروے کا آغاز گلگت بلتستان سے کیا جائے گا۔میڈیا سے گفتگو کرتے ہوئے انہوںنے کہاکہ گزشتہ دنوں کے سیلاب نے پورے پاکستان بشمول گلگت بلتستان کو شدید متاثر کیا۔انہوں نے کہا کہ اس سیلاب کے بعد حکومت کا ایک ایک فرد اور ادارے کی کوشش رہی ہے کہ متاثرین جلد اپنی پہلی والی روز مرہ کی زندگی کی طرف لوٹ آئیں۔ انہوں نے کہا کہ وزیر اعظم پاکستان سیلاب کے بعد ایک دن بھی آرام سے نہیں بیٹھے ،ہر وقت متاثرہ علاقوں کا دورہِ کر کے متاثرین کی بحالی کے کام کر رہے ہیں۔انہوں نے کہا کہ اس سیلاب کے بعد ہمارے دوست ممالک اور اندرون ملک سے جن جن دوستوں اور بھائیوں نے مدد کی ان کو ہم سلام پیش کرتے ہیں۔ انہوں نے کہا کہ متاثرین کی مدد کیلئے این ڈی ایم،جی بی ڈی ایم اے اور پاک فوج کے ذریعے سروے کیا جائیگا اور اس کے ان کی مالی مدد کی جائے گی۔انہوں نے کہا کہ سیلاب کے بعد تاجروں نے چیزیں مہنگی کر دیں ہیں،اس لئے صوبائی حکومتوں کی یہ ذمہ داری ہے کہ وہ اس پر نظر رکھیں۔
