کوئٹہ، اسلام آباد (این این آئی)کوئٹہ شہر اور دیگر علاقوں میں گیس کی سپلائی تاحال معطل ہے جبکہ ایل پی جی من مانی قیمت پر فروخت ہونے لگی ہے۔سوئی گیس کی سپلائی معطل ہونے کی وجہ سے ایل پی جی سلینڈر کی دکانوں پر رش بڑھ گیا اور دکانداروں نے طلب بڑھنے پر

گیس کے نرخ میں من مانا اضافہ کر دیا ہے۔کوئٹہ میں ایل پی جی فی کلو 300 روپے تک میں فروخت کی جا تی رہی جبکہ نواحی علاقوں میں ایل پی جی 400 روپے فی کلو میں فروخت کی جا تی رہی ،اس کے علاوہ بلوچستان کے مختلف شہروں میں بجلی کے ٹاور گرنے کے باعث بجلی بند ہوگئی ،وزیراعظم کی ہدایت کے باوجود کچھ علاقوں میں موبائل فون نیٹ ورک سروس بھی متاثر رہی۔دوسری جانب عوامی نیشنل پارٹی کے ترجمان زاہد خان نے کہاہے کہ عمران خان اور وزیراعلی خیبرپختونخوا مزے لوٹ رہے ہیں ، لوگ سیلاب میں بہہ رہے ہیں۔ترجمان عوامی نیشنل زاہد خان نے کہاکہ کوہستان میں 5 بھائیوں کی وڈیو انتہائی تکلیف دہ ہے، پانچ بھائی کئی گھنٹے مدد کے لئے منتظر رہے لیکن نااہل صوبائی حکومت بے خبر رہی۔ انہوںنے کہاکہ عمران خان اور وزیراعلی خیبرپختونخوا مزے لوٹ رہے ہیں اور لوگ سیلاب میں بہہ رہے ہیں، عمران خان نے صرف اپنی پبلسٹی کے لئے ہیلیکاپٹر میں بیٹھ کر دورے کی خبریں چلوائیں۔ انہوںنے کہاکہ عمران خان کو ہیلیکاپٹر فراہم کرنے کی بجائے ان پانچ بھائیوں کو ریسکیو کرنا چاہیے تھا، پانچ بھائیوں کے واقعے کے مقدمہ عمران خان اور محمود خان کے خلاف درج کیا جائے۔