کراچی(این ین آئی) پیپلز پارٹی کی رہنما شہلا رضا نے بھی وزارت سے استعفی دے دیا ہے، سعید غنی اور شہلا رضا نے بلدیاتی انتخاب کی مہم چلانے کے لئے استعفے دیے ہیں۔ واضح رہے کہ سندھ کے وزیرمحنت سعید غنی نے صوبائی وزیر کی

حیثیت سے استعفیٰ وزیر اعلی سندھ کو بھجوادیا ہے۔اس حوالے سے اپنے ایک پیغام میں سعید غنی نے کہا کہ میں نے الیکشن مہم میں حصہ لینے کیلئے صوبائی کابینہ سے استعفیٰ وزیر اعلی کو سندھ بھجوایا ہے جو تاحال منظور نہیں ہوا ہے۔انہوں نے کہا کہ بحیثیت صدر پی پی پی کراچی میری یہ خواہش ہے کہ میں کارکنوں کے ساتھ الیکشن مہم میں حصہ لوں۔سعید غنی نے کہا کہ استعفے کے منظوری کا فیصلہ پارٹی قیادت اور وزیر اعلی صاحب نے کرنا ہے۔ ذرائع کے مطابق سعید غنی کے استعفے پر فیصلہ بلاول بھٹو زرداری کریں گے،ذرائع نے بتایاکہ سعید غنی وزیر کی حیثیت میں مہم نہیں چلا سکتے ہیں۔ سعید غنی کے پاس وزارت محنت و افرادی قوت کا قلمدان ہے۔یہاں یہ بات بھی قابل ذکر ہے کہ قومی اسمبلی کے حلقہ این اے 245 کے ضمنی الیکشن اور بلدیاتی انتخابات کے دوسرے مرحلے کیلئے پولنگ مقررہ وقت پر 21 اور 28 اگست کو ہوگی۔سندھ میں دوسرے مرحلے میں کراچی اور حیدر آباد میں ہونے والے انتخابات میں 9046 پولنگ اسٹیشن قائم کیے گئے ہیں۔ پاک آرمی اور رینجرز کے فلیگ مارچ پولنگ کے دوران پولنگ اسٹیشنز کے احاطے کے آس پاس مسلسل مارچ کرتے رہیں گے، تاکہ کسی بھی ناخوشگوار واقعہ پر فوری کارروائی عمل میں لائی جا سکے۔