راولپنڈی (این این آئی)پنجاب فوڈ اتھارٹی نے اٹک میں جعلی کولڈ ڈرنکس سپلائی کرنیوالے گودام پر چھاپہ مار کر 8811 لٹر معروف برانڈز کی جعلی کولڈ ڈرنکس برآمد کر لیں ۔ڈی جی فوڈ اتھارٹی شعیب خان کے مطابق فوڈ سیفٹی ٹیم نے خفیہ اطلاعات پر فتح جنگ میں کارروائی کی۔کولڈ ڈرنکس کے نمونوں کا جدید ترین ٹیکنالوجی کی مدد سے موقع پر معائنہ کیا گیا۔نمونوں میں مضر صحت اور غیر معیاری اجزاء کی آمیزش پائی گئی۔ انہوں نے بتایا کہ کولڈ ڈرنکس کے نمونوں کو مزید تجزیے کیلئے فوڈ لیب بھجوایا گیا ہے۔ معروف برانڈز کی جعلی کولڈ ڈرنکس کو گردونواح میں سپلائی کیا جاتا تھا۔ ان کا کہنا تھا کہ جعل ساز مافیا کی سرکوبی کیلئے تمام وسائل کو بروئے کار لا رہے ہیں۔