اسلام آباد (این این آئی)مسلم لیگ (ق) کے رہنما مونس الٰہی نے کہاہے کہ چوہدری سالک کی بہن بھی ہمارے ساتھ ہیں۔ق لیگ کے رہنما مونس الہٰی نے سپریم کورٹ کے باہر میڈیا سے گفتگو کرتے ہوئے کہا کہ ہم عدالت میں حاضر ہوئے ہیں، اس وقت میرے ساتھ 9 ایم پی ایز موجود ہیں۔
یہ گواہی دینے آئے ہیں کہ انہیں نہ تحریری اور نہ ہی زبانی ہدایت ملی۔مونس الہٰی نے کہا کہ پرویز الہٰی لاہور میں ہیں جو ویڈیو لنک پر موجود ہوں گے، چوہدری سالک کی بہن بھی ہمارے ساتھ ہیں۔انہوں نے کہا کہ چوہدری شجاعت کی بیٹی ایم پی اے ہیں، وہ ساتھ والے گھر میں رہتی ہیں لیکن ان کو بھی اس سے متعلق کوئی ہدایت نہیں ملی۔دوسری جانب تحریک انصاف کے رہنما اسدعمر نے کہا ہے کہ ہمیں کسی کی مداخلت اور بیساکھی کی ضرورت نہیں ،ہمیں نہ سخت نہ نرم مداخلت اورنہ ہی یقین دہانیوں کی ضرورت ہے۔ایک انٹرویومیں اسدعمر نے کہا کہ سیاسی معاملات سیاستدانوں کوحل کرنے چاہئیں ،مل بیٹھ کرانتخابات پربات چیت کی جائے، الیکشن کب ہونے ہیں، اس کا فیصلہ سپریم کورٹ نہیں سیاستدان کریں گے ۔ انہوںنے کہاکہ آئیں معاملات طے کریں الیکشن کب کرانے ہیں، مداخلت کی ضرورت ہی نہیں۔انہوں نے کہا کہ تحریک انصاف نے پنجاب میں پی ڈی ایم کوبری طرح شکست دی عوام کے مینڈیٹ سے پی ڈی ایم کے وزیراعلیٰ کو گھر بھیج رہے ہیں ،یہ 3ججزاس بینچ میں بھی موجودتھے جس کے فیصلے سے عمران خان کی حکومت ختم ہوئی۔اسدعمر نے کہا کہ بینچ کا فیصلہ آنے دیں اس کے بعدپی ڈی ایم چاہے توضرورفل کورٹ کی اپیل کرے۔
