اسلام آباد،لاہور (این این آئی)حمزہ شہباز کے وزیراعلیٰ پنجاب منتخب ہونے اور اچانک سیاسی صورتحال تبدیل ہونے پر سوشل میڈیا پر میمز کا طوفان آگیا۔ گزشتہ روز وزیر اعلیٰ پنجاب کے انتخاب کیلئے ووٹنگ ہوئی جس میں حمزہ شہباز نے اکثریت کی حمایت حاصل کرلی جب کہ
ووٹنگ میں پی ٹی آئی کے امیدوار پرویز الہیٰ نے 186 ووٹ لیے اورحمزہ شہباز نے 179 ووٹ لیے تاہم (ق) لیگ کے سربراہ چوہدری شجاعت نے ڈپٹی اسپیکر دوست مزاری کو خط بھجوایا جس میں انہوں نے (ق) لیگ کے ارکان کو حمزہ شہباز کو ڈالنے کی ہدایت کی تھی۔اس سارے معاملے کے بعد سوشل میڈیا پر میمز کا طوفان آگیا جس میں کسی نے چوہدری شجاعت کو دھوکے باز قرار دیا تو کوئی آصف زرداری کی شجاعت حسین سے ملاقات کو اس تبدیلی کا ذمہ دار قرار دیتا رہا۔دوسری جانب مسلم لیگ (ن) نے رہنما پرویزرشید نے وزیراعلیٰ پنجاب کے معاملے پر پی ٹی آئی کارکنان کے احتجاج پر ردعمل کا اظہار کرتے ہوئے کہا ہے کہ یہ وہی فیصلہ ہے جس پر عمرانیوں نے بھنگڑے ڈالے،عمرانیوں نے احتجاج ہی کرنا ہے تو اپنے اْن قانونی مشیروں کے خلاف کریں۔ایک بیان میں پرویز رشید نے کہاکہ عمرانیوں نے احتجاج ہی کرنا ہے تو اپنے ان قانونی مشیروں کے خلاف کریں جن کے سپریم کورٹ سے حاصل کردہ فیصلے کو ڈپٹی اسپیکر پنجاب اسمبلی نے صرف دہرایا ہے۔ انہوں نے کہا کہ یہ وہی فیصلہ ہے جس پر عمرانیوں نے بھنگڑے، لڈیاں ڈالیں اور لڈو بھی بانٹے تھے۔واضح رہے کہ (ن) لیگ کے امیدوار حمزہ شہباز دوبارہ وزیراعلیٰ پنجاب منتخب ہوگئے جبکہ پرویز الہیٰ کو شکست کا سامنا کرنا پڑا۔
