لاہور(این این آئی) وفاقی کالونی جوہر ٹائون میں نامعلوم افراد کے تشدد سے باپ قتل جب کہ جواں سال بیٹی زخمی ہو گئی۔تفصیلات کے مطابق لاہور میں وفاقی کالونی جوہر ٹائون میں نامعلوم افراد کے تشدد سے ایک شخص جان سے ہاتھ دھو بیٹھا، مقتول کی بیٹی کا کہنا ہے کہ حملہ
آوروں نے بتایا کہ وہ بینک ملازمین ہیں۔واقعے کے بعد 24 سالہ زخمی بیٹی زینب کو طبی امداد کے لیے جناح ہسپتال منتقل کر دیا گیا، پولیس اور فرانزک ٹیموں نے موقع پر پہنچ کر شواہد اکٹھے کر لیے، سی سی پی او بلال صدیق نے واقعے کا نوٹس لیتے ہوئے ایس پی صدر سے رپورٹ طلب کر لی ہے۔زخمی لڑکی زینب نے بیان میں بتایا کہ ملزمان نے حملہ کرتے ہوئے کہا کہ وہ بینک ملازمین ہیں، ہم نے کال کی تو تم نے گالیاں نکالیں، تمھیں زندہ نہیں چھوڑیں گے۔زینب نے کہا حملہ آور نے میرے سر پر کوئی چیز ماری جس سے میں لہولہان ہوگئی، میں نے خود کو کمرے میں بند کر کے جان بچائی، سوائے ایک چین کے حملہ آوروں نے کوئی چیز نہیں اٹھائی، وہ صرف ہمیں مارنے آئے تھے۔مقتول شخص کے داماد نے پولیس کو بتایا کہ ان کی بیوی کے نمبر پر کچھ دنوں سے بینک اسکیم سے متعلق کال آ رہی تھی۔
