اسلام آباد (این این آئی)پاکستان سول ایوی ایشن اتھارٹی نے اپنے ریٹائرڈ ملازمین کی پینشن میں 30 ہزار روپے کی کمی کر دی، پینشن میں کمی ای جی 7 کے ریٹائرڈ ایڈیشنل ڈائریکٹرز کی ہوئی ہے۔سی اے اے کے جاری نوٹیفیکیشن کے مطابق

پینشن میں کمی کا فیصلہ سی اے اے کے بورڈ آف ڈائریکٹرز نے 25 مارچ کو اپنے 191 ویں اجلاس میں کیا۔ذرائع کے مطابق سی اے اے بورڈ نے پنشن میں کمی ڈائریکٹر جنرل خاقان مرتضی کی تجویز پر کی ہے، پنشن کٹوتی سے سول ایوی ایشن اتھارٹی کے سینکڑوں ریٹائرڈ ملازمین متاثر ہوئے ہیں۔سی اے اے کے ڈائریکٹر ایچ آر محمد نواز خان نے پنشن میں کمی کا پہلا نوٹیفیکیشن 20 جون کو جاری کیا پھر اسے منسوخ کر کے دوسرا نوٹیفیکیشن 25 جون کو جاری کیا اور اس میں کہا گیا کہ پنشن میں کٹوتی کا اطلاق پرانی تاریخ میں مارچ 2022 سے ہوگا۔نئے نوٹیفیکیشن کے بعد ریٹائرڈ افسران کی پنشن میں 30 ہزار روپے کی کمی ہوگئی، سی اے اے کے ریٹائرڈ افسر اور ایوی ایشن لاء کے ماہر عبید عباسی کے مطابق قانون کے تحت ریٹائرڈ ملازمین کی پنشن میں کمی نہیں کی جا سکتی جبکہ پنشن میں کٹوتی پچھلی تاریخ سے کرنا بھی غیر قانونی ہے۔سول ایوی ایشن اتھارٹی کے ترجمان نے بتایا کہ ریٹائرڈ ملازمین کی پنشن میں کمی نہیں کی جا رہی، پنشن میں کٹوتی کے دستاویزی ثبوت کے باوجود بھی ترجمان سی اے اے نے پینشن میں کٹوتی نہ ہونے پر اصرار کیا۔دوسری جانب ہونے والے ریٹائرڈ افسران نے پینشن میں کٹوتی کے خلاف عدالت سے رجوع کرنے کا اعلان کیا ہے۔