کراچی(این این آئی)متحدہ قومی موومنٹ کے ڈپٹی کنوینرکنور نویدجمیل کی برین ہیمریج کے باعث طبیعت ناساز ہو گئی ہے، جس پر انھیں کراچی کے ایک نجی اسپتال کے آئی سی یو منتقل کر دیا گیا ہے۔ایم کیوایم رابطہ کمیٹی کی جانب سے بتایا گیا کہ پیر کی رات ہائی بلڈ پریشر کی
وجہ سے کنور جمیل کی طبیعت خراب ہوگئی تھی جس کے بعد انھیں نجی اسپتال کیانتہائی نگہداشت کے وارڈ میں منتقل کردیا گیاہے۔اسپتال ذرائع نے تصدیق کی ہے کہ کنورنویدجمیل کوبرین ہیمریج کے باعث اسپتال لایاگیا اور ان کے سی ٹی اسکین سمیت دیگرٹیسٹ کیے گئے ہیں۔ یہ بھی بتایا گیا ہے کہ کنور نوید کی حالت تشویش ناک ہے۔ذرائع کے مطابق گزشتہ روز طویل اسمبلی اجلاس اور ورک لوڈ کے باعث ان کی طبعیت خراب ہو گئی تھی۔ایم کیو ایم کے کنوینر ڈاکٹر خالد مقبول صدیقی نے کارکنان اور عوام سے کنور نوید جمیل کی جلد صحت یابی کی دعا کی اپیل کی ہے۔واضح رہے کہ کنور نوید جمیل نے گزشتہ روز سندھ اسمبلی کے اجلاس میں شرکت کی تھی۔دریں اثناء وزیراعلی سندھ سید مراد علی شاہ نے کنور نوید کی طبعیت سے متعلق ایم کیو ایم رہنما خالد مقبول صدیقی اور خواجہ اظہار کو ٹیلی فون کیا اور ان کی خیریت دریافت کی۔وزیراعلی سندھ سید مراد علی شاہ نے اسپتال انتظامیہ کو بھی ٹیلی فون کرکے کنور نوید کو بہترین علاج مہیا کرنے کی ہدایت کی۔
