لاہور (آن لائن)سابق وزیر اعلی عثمان بزدار نے اپنی سکیورٹی و گاڑی کی فراہمی کیلئے دوبارہ لاہور ہائیکورٹ سے رجوع کر لیا۔ عثمان بزدار نے اپنے وکیل اظہر صدیق ایڈووکیٹ کے توسط سے متفرق درخواست دائر کی جس میں بتایا گیا ہے کہ سابق وزیر اعلی پنجاب کو سکیورٹی کے لیے خراب اور کھٹارہ گاڑیاں فراہم کی گئی ہیں۔درخواست میں یہ بھی نشاندہی کی گئی کہ عثمان بزدار کو قانون کے مطابق سکیورٹی اور ملازمین بھی فراہم نہیں کیے جارہے ۔ درخواست میں استدعا کی گئی کہ سابق وزیر اعلی کو سکیورٹی فراہم کرنا حکومت کی ذمہ داری ہے اس لیے حکومت کو سکیورٹی اور ملازمین فراہم کرنے کا حکم دیا جائے۔درخواست میں یہ بھی استدعا کی گئی کہ پنجاب حکومت کو ٹھیک گاڑیاں فراہم کرنے کا پابند کیا جائے۔