انقرہ(این این آئی) ترکی نے گندم میں روبیلا وائرس کی مشتبہ موجودگی کے باعث 56 ہزار ٹن سے زائد کی گندم کو ملک پہنچنے پر واپس کردیا۔میڈیارپورٹس کے مطابق ترکی نے بھارت سے 56 ہزار 877 ٹن گندم خریدی تھی اور بحری جہاز گندم کو لے کر ترکی کے ساحل پہنچا تھا

مگر وہاں کے حکام نے بھارتی گندم کو ملک میں اتارنے سے انکار کردیا۔ ترک حکام نے خدشہ ظاہر کیا کہ بھارتی گندم میں روبیلا وائرس کی موجودگی ہے۔ترکی کے محکمہ زراعت اور صحت کے حکام نے گندم میں وائرس کی موجودگی کو جواز بنا کر پوری گندم کو واپس بھارت بھیج دیا اور کہا کہ کورونا کی وبا کے دور میں وہ مزید رسک نہیں لے سکتے۔ترکی کی جانب سے ہزاروں ٹن خریدی گئی گندم کی واپسی اور اس میں روبیلا وائرس کی موجودگی کے انکشاف کے بعد بھارتی کسانوں اور بیوپاریوں میں تشویش کی لہر دوڑ گئی ہے اور حکام بھی پریشان دکھائی دیتے ہیں۔فوری طور پر بھارتی حکام نے ترکی کے فیصلے پر کوئی رد عمل نہیں دیا، تاہم زرعی ماہرین نے اس خدشے کو رد نہیں کیا کہ گندم میں روبیلا وائرس کی موجودگی نہیں ہو سکتی۔زرعی ماہرین کے مطابق روبیلا وائرس گندم کے فصل میں ہو سکتا ہے اور ممکنہ طور پر وائرس دانوں میں بھی پایا جا سکتا ہے۔بھارتی زرعی ماہرین اور کسانوں نے خدشہ ظاہر کیا کہ اگر گندم میں روبیلا وائرس کی موجودگی کی تصدیق ہوئی تو کسانوں کو اربوں روپے کا نقصان ہو سکتا ہے اور بھارتی گندم کو کوئی بھی ملک نہیں خریدے گا اور نہ ہی ملکی سطح پر اسے استعمال کیا جا سکے گا۔روبیلا وائرس ایک وائرل بخار ہے، یہ بیماری بچوں میں پائی جانے والی بیماری خسرہ کی ایک قسم مانی جاتی ہے۔