اسلام آباد(مانیٹرنگ ڈیسک، این این آئی ) برطانیہ کے وزیر برائے مسلح افواج جیمس ہیپی نے اس بات کو مسترد کیا ہے کہ سابق وزیر اعظم عمران خان کے دورہ روس کی وجہ سے کوئی سازش کی گئی ،ان کا کہنا تھا کہ حکومت کی تبدیلی میں مکمل طور پر پاکستان کے اندرونی معاملات کار فرما ہیں۔

برطانوی وزیر پاکستان کے دو روزہ دورے پر وزیر اعظم شہباز شریف سے ملاقات کے بعد صحافیوں سے وڈیو خطاب کررہے تھے۔روزنامہ جنگ میں صالح ظافر کی شائع خبر کے مطابق  برطانوی وزیر کا یہ بیان ایسے وقت سامنے آیا ہے جب سابق وزیر اعظم عمران خان سازش کا الزام لگا کر لانگ مارچ کررہے ہیں جس میں ان کا مطالبہ ہے جلد الیکشن کروائے جائیں۔ صحافیوں سے گفتگو کرتے ہوئے ان کا کہنا تھا کہ اس الزام کے بعد عمران خان سے ان کی حکومت مایوس ہوئی کیونکہ حکومت کی تبدیلی پاکستان کے اندرونی معاملات کی وجہ سے ہوئی ہے۔دوسری جانب وزیر اعظم شہباز شریف سے برطانوی وزیر دفاع کی سربراہی میں وفد نے ملاقات کی جس میں دوطرفہ امور اور خطہ کی صورتحال پر تبادلہ خیال کیا گیا۔ وزیراعظم آفس کے میڈیا ونگ کی طرف سے جاری بیان کے مطابق وزیراعظم شہباز شریف نے کہا کہ پاکستان اور یو کے کے مابین دیرینہ اشتراک کار موجود ہے اور دونوں ممالک اور عوام کے مابین تاریخی روابط موجود ہیں۔ وزیراعظم نے اس توقع کا اظہار کیا کہ پاکستان اور برطانیہ کے مابین انہانسڈ سٹریٹجک ڈائیلاگ (ای ایس ڈی) سے باہمی دلچسپی کے شعبوں میں دوطرفہ روابط کو مضبوط بنانے میں مدد ملے گی۔ انہوں نے دونوں ممالک کے مابین تجارت اور سرمایہ کاری کو مزید بڑھانے کی خواہش کا اظہار کیا۔ دونوں ممالک کے درمیان رواں سال سفارتی تعلقات کی 75 ویں سالگرہ کے حوالے سے وزیراعظم نے اس توقع کا اظہار کیا کہ اسے بہترین انداز میں منایا جائے گا اور اس سے دونوں ممالک کے مابین تعاون کو مزیدبڑھانے کے نئے مواقع میسر آئیں گے۔

موضوعات:برطانیہ