لاہور (آن لائن)سابق وفاقی وزیر حماد اظہر نے کہا ہے کہ عمران خان قوم کو امریکی ایجنٹوں سے نجات دلا کر دم لیں گے، ہماری اصل خوشی اسی دن ہوگی جس دن ہم چیئرمین عمران خان کی قیادت میں ان امریکی ایجنٹوں سے نجات پائیں گے ۔
ان خیالات کا اظہار انہوںنے گزشتہ روز امیر چوک میں نائب صدر لاہورفیاض بھٹی کی جانب سے آزادی مارچ کی تیاریوںکے حوالے سے منعقد کئے گئے ورکرز کنونشن سے خطاب کرتے ہوئے کیا۔انہوں نے کہا کہ قوم نے چیئرمین عمران خان کی کال پر لبیک کہہ کر ثابت کر دیا ہے کہ امپورٹڈ حکومت کی واپسی کا عمل شروع ہوچکا ہے۔ عوام نے عمران خان کی کال پر لبیک کہا ہے اور لوگ جوق در جوق گھروں سے نکلے ہیں ، امپورٹڈ حکومت کی عوام کی نظر میں کوئی حیثیت نہیں ، قوم اسلام آباد کا رخ کرے گی اورتب تک واپس نہیں لوٹے گی جب تک اس کرپٹ ٹولے کو واپس ان کے گھروں کو نہیں بھیج دے گی۔سینیٹر اعجاز احمد چوہدری نے کہا ہے کہ امپورٹڈ حکمرانوں نے معیشت کابیڑا غرق کردیا اور مہنگائی نے عوام کا جینا مشکل کر دیا ہے۔ڈالر آسمانوں سے باتیںکررہا ہے جبکہ روپیہ دن بہ دن گر رہا ہے ۔ملک میں حکومت نام کی کوئی چیز نہیں ہے۔قوم کا کاہی مطالبہ ہے فوری انتخابات کروائے جائیں۔امپورٹڈ حکومت کے دن گنے جا چکے ہیں۔عوام ان کو اقتدار کے ایوانوں سے اٹھا کر باہر پھنک دیں گے۔حقیقی آزادی کیلئے قوم جاگ چکی ہے ۔اس کا راستہ روکنا اب کسی کے بس کی بات نہیں۔
