نئی دہلی (این این آئی)بھارتی میڈیا نے دعویٰ کیا ہے کہ امریکہ پابندیاں لگاتے ہوئے بھی روس سے خام تیل خرید رہا ہے۔ میڈیا رپورٹس کے مطابق روس ۔یوکرین تنازع کے
بعد نہ صرف یورپی ممالک بلکہ امریکہ کی جانب سے روس سے درآمد شدہ فوسل فیول کی مجموعی مقدار بھارت سے زیادہ ہے۔بھارتی اخبار کے مطابق سینٹر فار انرجی اینڈ کلین ایئر ریسرچ جو ایک آزاد تحقیقاتی ادارہ ہے کی رپورٹ سے ظاہر ہے کہ روس-یوکرین تنازعے کے آغاز کے بعد ،دو ماہ کے اندرہی روس نے تریسٹھ ارب یورو کی توانائی برآمد کی جس کا 71 فیصد یورپی ممالک کو برآمد کیا گیا ہے۔اس کے علاوہ امریکہ کی روس سے درآمد کردہ توانائی کی مقدار بھارت سے بھی زیادہ ہے۔حالانکہ امریکی حکومت نے مارچ میں روس سے توانائی کی درآمد پر پابندی لگانے کا اعلان کیا تھا ،لیکن روس-یوکرین تنازع کے بعد امریکہ نے روس سے بڑی مقدار میں پیٹرول خریدا ہے۔بھارت کی مذکورہ اطلاعات کے بعد سوشل میڈیا پر امریکہ کو “منافق “کہا جا رہا ہے۔
