اسلام آباد (مانیٹرنگ ڈیسک) وفاقی وزیر داخلہ رانا ثناء اللہ نے کہاہے کہ امریکا میں سابق پاکستانی سفیر اسد مجید خان نے قومی سلامتی کمیٹی میں سب کے سامنے اعتراف کیا کہ انہوں نے کوئی ایسا لیٹر نہیں لکھا اور نہ ہی یہ ان کے لیٹر کے الفاظ ہیں۔ تقریب سے خطاب میں رانا ثناء اللہ نے کہا کہ اسد مجید خان نے قومی سلامتی کمیٹی کے اجلاس میں کہا کہ
ان کے خط کے الفاظ کو تبدیل کیا گیا۔رانا ثناء اللہ نے کہا کہ اسد مجید نے کہا خط میں سازش اور عدم اعتماد کا کوئی ذکر نہیں تھا، خط کو شاہ محمود قریشی نے اپنی نگرانی میں تبدیل کیا۔یاد رہے کہ دو روز قبل وزیراعظم شہباز شریف کی زیر صدارت قومی سلامتی کمیٹی کا اہم اجلاس ہوا تھا جس میں امریکا میں سابق پاکستانی سفیر اسد مجید خان نے مبینہ دھمکی آمیز مراسلے سے متعلق بریفنگ دی تھی۔وزیر داخلہ کے مطابق عمران خان کے مخالفین چور یا ڈاکو تھے تو 4 سال میں جرم ثابت کرتے، یہ جو جلسے کر رہا ہے، وقت پڑنے پر اس کا علاج ہو گا اور اگر اسلام آباد کی طرف آئے تو میں ان کا استقبال کروں گا اور ان سے خود نمٹوں گا۔ رانا ثناء اللہ کے بیان پر ردعمل دیتے ہوئے معروف صحافی ہارون رشید نے اپنے ٹوئٹ میں لکھا کہ عمران خان اسلام آباد آئیں میں خود ان سے نمٹوں گا، رانا ثناء اللہ۔ کس کس سے نمٹیں گے آپ،رانا صاحب ملک کا ملک عمران خان کا ہو چکا، ویسے اطلاعاً عرض ہے کہ وہ عمران خان ہے، عابد شیر علی نہیں، بائیں ہاتھ سے وہ آپ کو چھ فٹ اوپر اٹھا سکتا ہے۔ دوسری جانب ایم ایچ ملک نے اپنے ٹوئٹ میں کہا کہ وہ تو بیٹھا ہوا ہے اسلام آباد میں ہمت ہے تو جاؤ بنی گالہ اور ون ٹو ون سامنا کرو پھر دیکھیں تمہاری سلطان راہی کی بڑھکیں کیسے ختم ہوتی ہیں، عمران تو ایک شخص کا نام ہے جس دن اس نے کہا آؤ، پھر پورا پاکستان آئے گا اسلام آباد دیکھیں گے کون رانا کون خواجہ کون شریف کون زرداری روکے گا۔
