کراچی (این این آئی)وزیراعلی سندھ سید مراد علی شاہ نے ضلع حیدرآباد سے پیپلزپارٹی کے رکن صوبائی اسمبلی شرجیل انعام میمن کو اپنی کابینہ میں شامل کرلیا۔ جمعہ کی صبح گورنر ہاس میں قائم مقام گورنر آغا سراج درانی نے وزیر اعلی سندھ سید مراد علی شاہ کی موجودگی میں نئے وزیر شرجیل انعام میمن سے حلف لیا۔ تقریب حلف برداری میں صوبائی وزرا، مشیران، معاونین خصوصی، چیف سیکرٹری سہیل راجپوت اور صوبائی سیکرٹریز نے شرکت کی۔ اس سے قبل صوبائی حکومت نے وزیر ٹرانسپورٹ اویس قادر شاہ کو ڈی نوٹیفائی کر کے انکی جگہ شرجیل انعام میمن کو تعینات کیا۔ نئے صوبائی وزیر شرجیل میمن کو محکمہ اطلاعات کا قلمدان سونپا گیا ہے جوکہ اس سے قبل سعید غنی کے پاس تھا۔ محکموں کی دوبارہ تقسیم کے بعد سعید غنی کے پاس محنت اور انسانی وسائل کا قلمدان برقرار رہے گا جبکہ شرجیل انعام میمن وزیر اطلاعات ہوں گے۔