اسلام آباد (آن لائن) بجلی کا شارٹ فال 7 ہزار 1 سو میگاواٹ ہو گیا، ذرائع پاور ڈویژن کے مطابق پن بجلی ذرائع سے 9 سو میگاواٹ بجلی پیدا ہو رہی ہے۔ تربیلا ڈیم گزشتہ ساٹھ روز سے خالی ہے، تربیلا ڈیم میں ٹی تھری ،ٹی فور منصوبوں پر تعمیراتی کاموں کے باعث پانی ذخیرہ نہیں کیا جا رہا۔

تربیلا ڈیم سے صرف 6سو میگاواٹ بجلی پیدا ہو رہی ہے۔ منگلہ ڈیم میں بھی پانی کا ذخیرہ نہ ہونے کے برابر ہے۔ سرکاری تھرمل پاور پلانٹس کی پیداواری صلاحیت 4 ہزار میگاواٹ سے زائد ہے، ذرائع پاور ڈویژن کا مزید کہنا ہے کہ متعدد سرکاری بجلی گھر فنی خرابی کے باعث تاحال بند ہیں ، بعض بجلی گھر ایندھن کی کمی کے باعث بند ہیں، سرکاری تھرمل پاور پلانٹس سے 2 ہزار میگاواٹ تک بھی پیدا ہو رہی ہے، نجی شعبے کے بجلی گھر فرنس ائل،کوئلہ اور ایل این جی نہ ملنے کے باعث بند پڑے ہیں، آئی پی پیز کی پیداوار 11ہزار 5 سو میگاواٹ ہے۔ بجلی کی مجموعی پیداوار 14 ہزار 4 سو میگاواٹ ہے، بجلی کی مجموعی طلب 21ہزار 5 سو میگاواٹ سے زائد ہے،بجلی کی تقسیم کار کمپنیوں کے تکنیکی مسائل کے باعث 2 ہزار میگاواٹ پیدا شدہ بجلی ضائع ہو رہی ہے، پیدا شدہ بجلی استعمال نہ ہونے سے معشیت پر روزانہ 3 ارب روپے کا نقصان ہو رہا ہے۔ بجلی کی کمی کے باعث 10 گھنٹے تک غیر اعلانیہ لوڈ شیڈنگ کا سلسلہ جاری ہے ۔زیادہ لاسز والے علاقوں میں 18 گھنٹے تک لوڈ شیڈنگ بھی کی جا رہی ہے۔