اسلام آباد (مانیٹرنگ ڈیسک /آن لائن)پاکستان تحریک انصاف کے چیئرمین عمران خان کے گذشتہ روز جلسے کے لیے اسلام آباد سے کراچی چارٹر طیارے میں پہنچے تھے جس کے متعلق انکشاف ہوا ہے کہ اس کا کرایہ دبئی میں مقیم پاکستانی بزنس مین نے ادا کیا۔

نجی ٹی وی جیو کے ذرائع کے مطابق چارٹر طیارے کے لیے نجی ایوی ایشن کمپنی کو 29 لاکھ روپے ادا کیے گئے اور یہ رقم دبئی میں مقیم ایک پاکستانی بزنس مین نے ادا کی۔واضح رہے کہ سابق وزیراعظم عمران خان کو کراچی لانے والا نجی کمپنی کا طیارہ کراچی پہنچ کر فنی خرابی کا شکار ہوگیا جس کے بعد عمران خان متبادل طیارے سے اتوارکی صبح اسلام آباد پہنچے۔ سابق وزیراعظم عمران خان ہفتے کی شب ساڑھے 8 بجے پاکستانی بزنس گروپ “اینگرو” کی ملکیت AP-PLE رجسٹریشن کے حامل طیارے میں اسلام آباد سے کراچی پہنچے تھے۔ سابق وزیراعظم عمران خان نے مزار قائد سے متصل باغ جناح میں پاکستان تحریک انصاف کے زیر اہتمام ایک بڑے جلسے سے خطاب کیا جس کے اختتام کے بعد انہوں نے پارٹی رہنماؤں سے ملاقاتیں کیں۔ عمران خان گورنر سندھ عمران اسماعیل کی ذاتی رہائش گاہ بھی گئے۔ اس دوران عمران خان کو کراچی سے اسلام آباد پہنچانے کے لیے دوسرے چارٹر طیارے کا بندوبست کیا گیا۔ گورنر سندھ عمران اسماعیل اور پارٹی کی دیگر قیادت نے عمران خان کو رخصت کیا جب کہ عمران خان صبح پانچ بجے اسلام آباد پہنچ گئے