کراچی (آئی این پی)گورنر اسٹیٹ بینک رضا باقر نے کہا ہے کہ سوشل میڈیا پر روشن ڈیجیٹل اکاونٹس ختم کرنے کی اور ایک سے دو ارب ڈالر نکلوانے کی خبریں غلط ہیں۔رضا باقر نے اوور سیز پاکستانیوں کو پیغام دیتے ہوئے کہا کہ

ڈیڑھ سال میں روشن ڈیجیٹل اکاونٹس میں 4ارب ڈالر جمع ہوئے ہیں، 4 لاکھ پاکستانیوں نے 175ممالک میں روشن ڈیجیٹل اکاونٹس کھولے ہیں، رواں مارچ روشن ڈیجیٹل میں کسی ایک ماہ میں ریکارڈ 29کروڑ ڈالر جمع کرائے گئے، روشن ڈیجیٹل اکاونٹس بینکوں کے ساتھ شروع کی گئی اسٹیٹ بینک کی کوشش ہے۔گورنر اسٹیٹ بینک کا کہنا تھا کہ روشن ڈیجیٹل اکاونٹس کا مقصد بیرون ملک مقیم پاکستانیوں کو ملک میں بینکاری سہولت فراہم کرنا ہے، اور یہ سہولت مزید بینک بھی مہیا کریں گے۔ روشن ڈیجیٹل اکاونٹس کے ذریعے ہیلتھ اور لائف انشورنس کی سہولت فراہم ہوں گی۔رضا باقر نے روشن ڈیجیٹل اکاونٹس کے ذریعے جڑے رہنے کے لئے اوورسیز پاکستانیوں کا شکریہ بھی ادا کیا۔