کراچی(مانیٹرنگ، این این آئی) سابق وزیراعظم عمران خان نے سماجی رابطے کی ویب سائٹ ٹوئٹر پر اپنے ویڈیو پیغام میں اوورسیز پاکستانیوں سے چندہ مانگ لیا، ان کا کہنا تھا کہ ہم نے نامنظور ڈاٹ کام کی ایک ویب سائٹ بنائی ہے جس کا مقصد اوورسیز پاکستانیوں سے چندہ جمع کیا جا سکے، تحریک انصاف کے چیئرمین عمران خان نے کہا کہ بیرون ملک سازش کے تحت ریجیم چینج کی سازش کی گئی

اور پاکستان کے کرپٹ ترین لوگوں کو ہم پر مسلط کیا گیا، انہوں نے کہا کہ یہ وہ لوگ ہیں جو ضمانت رہا ہیں یا وہ اربوں روپے کی کرپشن میں ملوث ہیں اور 30 سال سے چوری کر رہے تھے، عمران خان نے بیرون ملک مقیم پاکستانیوں کو مخاطب کرتے ہوئے کہا کہ جاگی ہوئی قوم کو اور جگا رہا ہوں پوری کوشش ہے کہ اس سازش کو ناکام بنائیں اور پاکستان کو الیکشن کے لئے تیار کیا جائے عوام الیکشن کے ذریعے فیصلے کریں۔ ان کا کہنا تھا کہ اوورسیز پاکستان کے فنڈز کی ضرورت ہے جس میں وہ بھرپور طریقے سے شرکت کریں یہ پاکستان حقیقی آزادی کی مہم ہے۔ دوسری جانب پاکستان تحریک انصاف نے شہرِ قائد میں ہونے والے جلسے کے لیے چندے کی اپیل کردی۔سابق وفاقی وزیر علی حیدر زیدی اور پی ٹی آئی رہنما نے ٹوئٹر پر چیئرمین پی ٹی آئی عمران خان کے ساتھ اپنی پارٹی کے بینک اکانٹ کی تفصیل شیئر کی۔علی حیدر زیدی نے اپنے ٹوئٹ میں اوورسیز پاکستانیوں اور ملک میں موجود پی ٹی آئی کے جیالوں سے اپیل کرتے ہوئے کہا کہ جو لوگ کراچی جلسہ کے لیے چندہ دینا چاہتے ہیں، براہ کرم! درج ذیل پی ٹی آئی آفیشل اکانٹ میں چندہ دیں۔اس اپیل پر ٹوئٹر صارفین کی جانب ملے جلے ردعمل سامنے آئے، کسی نے عمران خان اور ان کی جماعت پر تنقید کی تو وہیں کچھ صارفین نے چندہ دینے کی ہامی بھی بھری۔واضح رہے کہ پاکستان تحریک انصاف نے کراچی اور پشاور میں تاریخی جلسے کرنے کا اعلان کیا تھا، عمران خان نے 13 اپریل کو پشاور میں جلسہ کیا اور اب وہ 16 اپریل کو کراچی میں جلسہ کریں گے۔