کوئٹہ (این این آئی)گورنر بلوچستان سید ظہور آغا ایڈووکیٹ نے اپنے عہدے سے استعفیٰ دے دیا ہے۔ اپنے استعفے میں انھوں نے لکھا کہ وہ احتجاجاً استعفیٰ دے رہے ہیں کیونکہ وہ ایک ایسے امپورٹڈ وزیراعظم کو تسلیم نہیں کر سکتے ہیں، جسے 40 بلین روپے کی بدعوانی کے مقدمات کا سامنا ہو۔انھوں نے صدر پاکستان عارف علوی کو اپنا استعفیٰ جلد قبول کرنے کی درخواست کی ہے۔سید ظہور آغا کا شمار بلوچستان میں تحریک انصاف کے دیرینہ کارکنان میں ہوتا ہے۔ سیدظہور آغا گذشتہ سال جون میں بلوچستان کے گورنر مقرر کیے گئے تھے۔ سیاسی مبصرین کے مطابق سابق گورنر سید فضل آغا کے بعد سید ظہور آغا کے دور میں کوئٹہ میں گورنر ہاؤس پر عوامی رنگ بڑی حد تک غالب آگیا تھا۔