لاہور( این این آئی)صوبائی دارالحکومت لاہور کے سستے رمضان بازاروں میں اوپن مارکیٹ سے 10 روپے فی کلو سستی فراہم کی جارہی ہے تاہم ہر خریدار کو صرف 2 کلو چینی مل رہی ہے ،یوٹیلٹی اسٹورز پرچینی عام مارکیٹ سے 5 روپے سستی مل رہی ہے

تاہم یہاں سستی چینی لینے کے لیے شناختی کارڈ کی کاپی جمع کرانا لازمی ہے۔لاہور کے سستے رمضان بازاروں میں چینی پر 10روپے فی کلو سبسڈی دی جارہی ہے، 80 روپے کلو کے حساب سے ہر خریدار کو صرف 2 کلو چینی مل رہی ہے جبکہ بچوں کو چینی خریدنے کی اجازت نہیں۔شہریوں کا کہنا ہے کہ ماضی میں چینی پر 30 روپے فی کلو سبسڈی دی جاتی تھی، اب صرف 10 روپے کا فرق ہے، وہ پٹرول خرچ کرکے دور دراز علاقوں سے آتے ہیں۔دوسری جانب یوٹیلٹی اسٹورز پر چینی کیلئے سبسڈی مزید کم ہے، جہاں عام مارکیٹ سے چینی صرف 5روپے کلو سستی بیچی جا رہی ہے۔یوٹیلٹی اسٹورز پر سستی چینی خریدنے کے لئے شناختی کارڈ کی کاپی جمع کرانا لازمی شرط ہے، شناختی کارڈ کی کاپی جمع کرانے والے کو 5کلو والا چینی کا سستا تھیلا مل جاتا ہے۔بغیر شناختی کارڈ کے چینی 94 روپے فی کلو کے حساب سے ہی بیچی جا رہی ہے۔شہریوں کا شکوہ ہے کہ 5روپے سستی چینی باریک اور غیر معیاری ہے، حکومت ماضی کی طرح چینی پر زیادہ سبسڈی دے۔