لاہور(این این آئی)لاہور کی اسپیشل کورٹ نے منی لانڈرنگ کیس میں شہباز شریف اور حمزہ کی عبوری ضمانتوں میں27اپریل تک توسیع کردی۔ عدالت نے شہبازشریف کی عبوری ضمانت میں توسیع کرتے ہوئے سماعت 27 اپریل تک ملتوی کردی۔سینٹرل عدالت کے جج

اعجاز حسن اعوان نے کیس کی سماعت کی۔ شہبازشریف کے وکیل امجد پرویز نے عدالت میں شہبازشریف کی حاضری سے استثنیٰ کی درخواست جمع کروائی۔شہبازشریف کے وکیل نے عدالت میں موقف اختیارکیا کہ وہ عمرے پرجارہے ہیں اس لئے عبوری ضمانت میں لمبی تاریخ دی جائے۔فاضل جج نے وکیل کوعدالت میں درخواست لکھ کردینے کی ہدایت کی۔عدالت نے ایف آئی اے کے وکیل سے استفسار کیا کہ ایف آئی اے کو لمبی تاریخ دینے پر کوئی اعتراض ہے؟ جس پر انہوں نے کہا کہ ایف آئی اے کو کوئی اعتراض نہیں۔بعد ازاں عدالت نے شہباز شریف اور حمزہ شہباز کی عبوری ضمانت میں 27 اپریل تک توسیع کردی۔دوسری جانب مسلم لیگ(ن)کے ڈپٹی سیکرٹری جنرل عطااللہ تارڑ نے کہاہے کہ شہبازگل،شہزاد اکبر،اعظم خان اور گوہر نفیس کے نام نو فلائی لسٹ میں ہیں،ہم کہتے تھے یہ غیر ملکی ایجنڈے کے تحت ملک لوٹنے آئے تھے،ہم انکو ملک سے بھاگنے نہیں دینگے۔ میڈیا سے گفتگو کرتے ہوئے عطا ء اللہ تارڑ نے کہاکہ بیرونی سازش ایک ڈرامہ تھا،عمران خان لندن کے میئر کے مسلم امیدوار کے مقابلے میں یہودی کی کمپئین کرنے گئے،تب انکو امربالمعراف یاد نہیں تھا جب ایک یہودی کا الیکشن لڑنے گئے؟۔انہوںنے کہاکہ شہباز گل آج بھی امریکہ کی یونیورسٹی سے پیسے لیتا ہے،شہزاد اکبر کی بیوی سپینش ہے،ہم انکو ملک سے بھاگنے نہیں دینگے۔ایک شخص اقتدار کی کرسی سے چمٹنے کیلئے اداروں پر حملے کرارہا ہے۔