اسلام آباد (ویب ڈیسک ٗ آئی این پی) گزشتہ روز قومی اسمبلی میں تحریک عدم اعتماد کی کارروائی کا آغاز ہوتے ہی عمران خان نے رات کے اندھیرے میں وزیراعظم ہاؤس چھوڑ دیا اور جاتے جاتے اپنی حکومت کے وفاقی وزراء کو بڑا سرپرائز دے گئے۔میڈیا رپورٹس کے مطابق عمران خان بنی گالا روانگی سے پہلے وزیراعظم ہاؤس کے عملے سے ملاقات کی جبکہ سابق وزیراعظم کا ذاتی سٹاف بھی
وزیر اعظم ہاؤس سے چلا گیا۔وفاقی وزراء شاہ محمود قریشی، فواد چوہدری اور شیریں مزاری عمران خان سے ملنے پہنچے تو پتا چلا اب یہاں کوئی نہیں ہے، تمام وزراء اور معاونین کی پی ایم ہاؤس میں داخلے پر پابندی عائد کر دی گئی۔دوسری جانب پیپلز پارٹی کے رہنما سعید غنی تحریک انصاف کے رکن قومی اسمبلی علی محمد خان کی عمران خان سے متعلق ٹوئٹ پر طنز کرتے ہوئے کہاہے کہ ہم آخری بال لیکر عمران خان کو ڈھونڈتے رہے، عمران نیازی، جنرل نیازی کی طرح میدان چھوڑ کر بھاگ گیا۔ تفصیلات کے مطابق گزشتہ روز قومی اسمبلی میں عمران خان کے خلاف پیش کی گئی تحریک عدم اعتماد کے موقع پر علی محمد خان عمران خان کی حکومت کی جانب سے واحد فرد تھے جو تحریک عدم اعتماد کی ووٹنگ کے موقع پر ایوان میں موجود تھے۔ علی محمد خان نے سوشل میڈیا پر ٹوئٹ کرتے ہوئے لکھا تھا کہ آخری بال تک لڑ رہا ہے ہمارا کپتان۔ پاکستان تحریک انصاف کے رہنما کے ٹوئٹ پر ردعمل دیتے ہوئے سعید غنی نے لکھا کہ کہاں اور کس سے؟ میدان میں تو نہیں تھا۔ سعید غنی نے سوشل میڈیا پر ایک اور ٹوئٹ کرتے ہوئے لکھا کہ ہم آخری بال لیکر صبح سے عمران خان کو ڈھونڈتے رہے لیکن آخری بال کھیلنے کا جھوٹا دعوی کرنے والا عمران نیازی، جنرل نیازی کی طرح میدان چھوڑ کر بھاگ گیا۔
