اسلام آباد(مانیٹرنگ ڈیسک، این این آئی)سینئر صحافی کامران خان نے نجی ٹی وی دنیا نیوز میںگفتگو کرتے ہوئے کہا ہے کہ سپریم کورٹ آف پاکستان موجودہ صورتحال کا بغور جائزہ لے رہی ہے ، انکی اطلاعات کے مطابق چیف جسٹس عمر عطا بندیا ل ایک لارجر بنچ تشکیل دینے جارہے ہیں جو کہ اس معاملے کی فوری سماعت کریگا، یاد رہے کہ شہبازشریف
اور بلاول بھٹو نے ڈپٹی سپیکر کے اقدام کیخلاف سپریم کورٹ جانے کا اعلان کیا تھا، اس سے قبل وزیراعظم عمران خان نے صدر مملکت عارف علوی کو اسمبلیاں تحلیل کرنے کی تجویز دیتے ہوئے کہاہے کہ سازش ساری قوم کے سامنے ہورہی تھی ، قوم اس شازی کو کامیاب نہیں ہونے دیگی ،کوئی باہر سے یا کرپشن کا پیسہ اس ملک کا فیصلہ نہیں کریگا، قوم الیکشن کی تیاری کرے،آپ نے ملک کا فیصلہ کرنا ہے، اسمبلیاں تحلیل ہونے کے بعد جو ہوگا وہ سب دیکھیں گے،جیسے ہی صدر اسمبلیاں تحلیل کریں گے تو نگراں حکومت کا عمل شروع ہوگا ۔اتوار کو قوم سے خطاب میں وزیراعظم عمران خان نے تحریک عدم اعتماد مسترد ہونے پر قوم کو مبارکباد دی۔وزیراعظم عمران خان نے کہا کہ اس طرح کی سازش قوم کامیاب نہیں ہونے دیگی، اسپیکر نے اپنی اتھارٹی اور آئینی طاقت سے جو فیصلہ کیا اس کے بعد میں نے ابھی سے صدر کو اسمبلیاں تحلیل کرنے کی تجویز بھیج دی ہے۔انہوں نے کہا کہ جمہوری معاشرے میں عوام کے پاس جائیں، الیکشن ہوں، عوام فیصلہ کرے وہ کسے چاہتے ہیں، کوئی باہر سے سازش، کرپٹ لوگ، پیسہ دے کر قوم کا فیصلہ نہ کریں۔وزیراعظم نے کہا کہ جنہوں نے اچکنیں سلوائیں اور لوگوں کو کروڑوں روپے دئیے تو وہ پیسہ ضائع ہوگا۔انہوں نے کہا کہ کوئی باہر سے یا کرپشن کا پیسہ اس ملک کا فیصلہ نہیں کریگا، جیسے ہی صدر اسمبلیاں تحلیل کریں گے تو نگراں حکومت کا عمل شروع ہوگا۔وزیراعظم نے کہا کہ اللہ کا شکر ادا کرتا ہوں ملک سے بہت بڑی سازش کی جارہی تھی، 22 کروڑ قوم کی حکومت کو گرانے کی کوشش کی گئی وہ سازش فیل ہوگئی، اس پر قوم کو مبارکباد دیتا ہوں۔
