ریاض (آئی این پی) سعودی عرب میں آئل تنصیبات پر حملوں سے تیل کی قیمتوں میں اضافہ ہو گیا۔سعودی عرب کے شہر جدہ میں آئل تنصیبات پر حوثیوں کے میزائل اور ڈروں حملوں سے عالمی مارکیٹ میں تیل کی قیمتوں میں اضافہ ہو گیا۔ برینٹ خام تیل کی فی بیرل قیمت 120 جبکہ امریکی ڈبلیو ٹی آئی کی فی بیرل قیمت 112 ڈالر ہو گئی۔یورپی کمیشن کی
صدر ارسولا وان ڈیرنے برسلز میں امریکی صدر کے ساتھ نیوز کانفرنس کی ، بولیں کہ یورپی یونین روس کے متبادل امریکا سے مہنگی گیس نہیں خریدے گی۔ یورپی کمیشن خود گیس خرید کر ممبران میں تقسیم کرے گا۔ خبر ایجنسی کے مطابق یورپی یونین کا امریکا سے 15 بلین کیوبک میٹر گیس خریدنے کا معاہدہ طے پا گیا۔وزیر توانائی قطر سعد الکعبی نے امریکی ٹی وی کو انٹر ویو میں کہا کہ یورپ کے لئے روس کی گیس کا کوئی متبادل نہیں۔ یورپی منڈی میں روسی قدرتی گیس کو تبدیل کرنا ممکن نہیں۔ عالمی منڈی میں کل گیس کا 40 فیصد روس سے آتا ہے۔ قطر روس کے تیل اور گیس کے شعبے پر پابندیاں عائد نہیں کرے گا۔ادھر امریکی اسٹاک مارکیٹ میں ملا جلا رجحان رہا۔ روس پرپابندیوں اور شرح سود میں اضافہ سے اسٹاک مارکیٹ میں سرمایہ کاری متاثر ہو ئی۔ ڈاؤ جونز انڈسٹریل انڈیکس 153 پوائنٹس کے اضافے سے 34 ہزار 861 پوائنٹس پر بند ہوا۔ نیسڈیک ٹیکنالوجی انڈیکس 22.54 پوائنٹس کی کمی سے 14 ہزار 169 پوائنٹس پر بند ہوا۔عالمی مارکیٹ میں سونے کی فی اونس قیمت 4 ڈالر کی کمی سے 1957 ڈالر ہو گئی۔ پلاٹینم کی فی اونس قیمت 25 ڈالر کم ہو کر ایک ہزار پانچ ڈالر پر آ گئی۔ پلاڈئیم کی فی اونس قیمت 187 ڈالر گر کر 2 ہزار 343 ڈالر پر آ گئی۔کرپٹو کرنسی بٹ کوائن اور ایتھرئیم کی قدر میں کمی ، بٹ کوائن کی قدر 57 ڈالر کی کمی سے 44 ہزار 279 ڈالر ہو گئی۔ ایتھرئیم کی قدر 2 ڈالر کی کمی سے تین ہزار ایک سو ڈالر ہو گئی۔عالمی مارکیٹ میں ملائیشین پام آئل کی قیمت میں کمی ،ملائیشین پام آئل کی فی ٹن قیمت 43 ڈالر کی کمی سے ایک ہزار پانچ سو تینتالیس ڈالر ہو گئی۔
