اسلام آباد ( آن لائن ، این این آئی)تحریک انصاف نے 14 منحرف اراکین قومی اسمبلی کوشوکاز نوٹس جاری کر دیئے،منحرف اراکین کو وزیراعظم کے سامنے پیش ہونے کی ہدایت کی گئی ۔یہ نوٹس تحریک انصاف کے سیکرٹری جنرل اسد عمر کی جانب سے جاری کئے گئے ہیں ۔

نور عالم خان، افضل ڈھاندلا، نواب شیر وسیر، راجہ ریاض، احمد حسین ڈیہر، رانا قاسم نون، غفار وٹو، باسط بخاری،عامر گوپانگ، خواجہ شیراز، سردار ریاض مزار، وجیہہ اکرام، نزہت پٹھان اور رامیش کمار کو شوکاز نوٹس جاری کئے گئے،،شوکاز نوٹس میں منحرف ارکان سے وضاحت طلب کی گئی ہے،ارکان کو 7 روز کے اندر معافی مانگ کر غیر مشروط پارٹی میں واپس آنے کی مہلت دی گئی ہے ،نوٹس میں کہاگیا ہے کہ 7 روز تک جواب نہ دینے اور واپس نہ آنے والوں کے خلاف قانونی کاروائی کی جائے گی۔دوسری جانب بھکر سے تحریک انصاف کے ایم این اے افضل ڈھانڈلہ نے ویڈیو پیغام میں کہا ہے کہ مجھے کہیں سے بھی پیسوں کی کوئی آفر نہیں ملی، میرے مسلم لیگ ن سے دیرینہ تعلقات ہیں جس سے انکار نہیں، اس وقت ملک کی داخلی، سیاسی اور معاشی حالت کی وجہ سے ہر پاکستانی پریشان ہے، ایک منتخب عوامی نمائندہ ایسے حالات میں کیسے لاتعلق رہ سکتا ہے، ان حالات میں اپنے ووٹ کا استعمال اپنے علاقے کے ووٹرزسپورٹرز اور عوام سے مشاورت سے کرونگا، میں کسی لالچ یا دباؤ میں نہیں اپنے ضمیر کے مطابق ووٹ کا استعمال کرونگا۔