اسلام آباد (آن لائن)پاکستان پیپلز پارٹی کی مرکزی رہنما سنیٹر پلوشہ خان نے شیخ رشید کی پریس کانفرس پر ردعمل کا اظہار کرتے ہوئے کہا ہے کہ شیخ رشید
ہی عمران خان کی حکومت کے خلاف خود کش بمبار ہیں جو کسی بھی وقت حکومت کی پائوں میں پھٹ سکتے ہیں۔ انہوں نے کہا کہ آصف علی زرداری سیاست میں اعتماد کی علامت ہیں یہی وجہ ہے کہ سیاسی پارٹیاں ان کی بات پر اعتماد کرتی ہیں۔ انہوں نے کہا کہ پی ٹی آئی کے اراکین پارلیمنٹ بھی عمران خان کی قید سے رہائی چاہتے ہیں۔ سینیٹر پلوشہ خان نے کہا کہ ملک نالائق وزیراعظم کے رحم و کرم پر نہیں چھوڑ سکتے۔ عوام عمران خان نامی وباء سے نجات چاہتے ہیں۔ سینیٹر پلوشہ خان نے کہا کہ جب نالائق وزیراعظم نالائق وزیر خارجہ اور کرائے کا وزیر خزانہ ہو تو ملک کا حشر نشر ہوتا ہے۔ انہوں نے کہا کہ عوامی مارچ کے اسلام آباد پہنچنے تک عمران خان کے قدم اکھڑ چکے ہوں گے۔
