لاہور (این این آئی) پاکستان سپر لیگ کے ساتویں سیزن کے پلے آف مرحلے سے قبل پشاور زلمی کو دوسرا بڑا جھٹکا لگ گیا، ایک اور غیر ملکی کھلاڑی نے وطن واپسی کا عندیہ دیدیا۔ذرائع کے مطابق پاکستان سپر لیگ کے ساتویں سیزن میں شامل غیر ملکی کرکٹرز کی بہانے بازیاں جاری ہیں، پشاور زلمی میں شامل غیر ملکی کھلاڑی ردر فورڈ کے ایونٹ سے

دستبردار ہونے کے بعد پشاور زلمی کے ہی ایک اورکرکٹر لیونگسٹن نے انگلی پرمعمولی انجری کا بہانہ بنا کر باقی میچ کھیلنے سے معذر ت کرتے ہوئے پی ایس ایل کے سفر کے اختتام کا عندیہ دیدیا ہے۔ ذرائع کے مطابق پشاور زلمی کی ٹیم میں شامل انگلش کرکٹر لیونگسٹن نے بھی وطن واپسی کا عندیہ دیدیا ہے، جس کے بعد پی ایس ایل میں غیر ملکی کھلاڑیوں کی جانب سے میگا ایونٹ ادھورا چھوڑ کر جانے والوں میں ایک اور نام شامل ہونے کا امکان ہے۔ذرائع کا کہنا ہے کہ لیونگسٹن بائیو سیکور ببل سے اکتا کر وطن واپس جانا چاہتے ہیں۔دوسری جانب قومی کرکٹ ٹیم کے سابق کپتان انضمام الحق نے جیمز فالکنر کے رویے کی سخت الفاظ میں مذمت کرتے ہوئے کہا کہ ہر اس کھلاڑی کے خلاف سخت ایکشن لینا چاہیے جو اس قسم کی الزام تراشی میں ملوث ہے۔ انہوں نے کہا کہ جیمز فالکنر نے بہت غلط حرکت کی، پاکستان کرکٹ بورڈ کو جیمز فالکنر کی اس حرکت سے سختی سے نمٹنا چاہیے کیونکہ اس قسم کی چیزیں ملک کے وقار اور

عزت کے لیے انتہائی اہم ہوتی ہیں۔ انضمام الحق کا کہنا تھا کہ اگر کوئی پاکستانی کھلاڑی کسی دوسرے ملک میں ایسا کرتا تو اس کے خلاف سخت ایکشن ہوتا۔انہوں نے پاکستان کرکٹ کے سابق ہیڈ کوچ باب وولمر کے واقعے کو یاد کیا اور کہا کہ انہوں نے 2007 کے ورلڈ کپ میں آئرلینڈ کے خلاف پاکستان کی ہار کو اپنے دل پر لیا اور خودکشی کر لی، اس کے بعد پاکستان کے خلاف مکمل تحقیقات کی گئی تھیں۔