لاہور( این این آئی)مسلم لیگ(ن) پنجاب کی سیکرٹری اطلاعات عظمی بخاری نے کہا ہے کہ صحت کارڈ منصوبہ عمران حکومت کامدر آف آل سکینڈلزہوگا،چینی سکینڈل،گندم سکینڈل،پیٹرو ل اور ادویات سکینڈل اس مہا
سکینڈل کے سامنے چھوٹے ہیں،صحت کارڈ کے نام پر بنی گالہ لوٹ مار ایسوسی ایشن قوم کو دن رات بیوقوف بنانے پر لگی ہے ۔ اپنے بیان میں انہوں نے کہا کہ اربوں روپے اشتہاری مہم پر خرچ کرنے کی بجائے ہسپتالوں میں نئی مشینری پر خرچ کردئیے جاتے تو زیادہ بہتر ہوتا،فراڈ اور دونمبری تبدیلی سرکار وطیرہ بن چکا ہے ،تحریک انصاف میں جو جتنے زیادہ جھوٹ بول رہا ہے اس کو اتنی ہی شاباش ملتی ہے ۔ انہوں نے کہا کہ عمران خان کے خلاف تحریک عدم اعتمادلانے کے اعلان کے بعد حکومت لڑکھڑا گئی ہے ،تبدیلی کی ڈوبتی کشتی سے جو جتنا جلدی اترے گا اس کا سیاسی مستقبل اتنا محفوظ ہوگا،حکومتی اتحادیوں کا سیاسی مستقبل بھی تاریخ کے دوراہے پر کھڑاہے ،تحریک انصاف اور عمران خان کا مستقبل پہلی باری میں ہی ختم ہوگیا ہے۔
