لاہور( این این آئی) پاکستان مسلم لیگ (ن) کے ڈپٹی سیکرٹری جنرل عطا اللہ تارڑ نے کہا ہے کہ یہ مصدقہ اطلاعات آ رہی ہیں کہ نام نہاد وزیر اعظم عمران خان نے مشیر احتساب بریگیڈئیر (ر) مصدق عباسی کو بلا کر یہ ہدایات جاری کی ہیں کہ شہباز شریف کو ہر حال میں گرفتار کیا جائے ،مسلم لیگ (ن) منظم ہے اگر کسی نے شہباز شریف کی جانب ہاتھ بھی بڑھانے کی کوشش کی تو احتجاج کے ذریعے دن میں تاریں دکھا دیں گے ۔
اپنے ویڈیو بیان میں عطا اللہ تارڑ نے کہا کہ حکومت پہلے بھی دو مرتبہ قائد حزب اختلاف شہباز شریف کی گرفتاری عمل میں لا چکی ہے اور صرف عمران نیاز ی کی انا کی وجہ سے گرفتار کیا گیا ،نیب ایک ایسے کیس میں گرفتار کیا جس میں جب ہائیکورٹ نے ضمانت منظور کی تو کہا کہ کسی طرح کی کرپشن ،کک بیک ،کمیشن یا اختیار ات کے ناجائز استعمال کا کوئی الزام نہیں ۔ شہباز شریف کو بلایا صاف پانی میں گیا اور آشیانہ میں گرفتار کیا گیا اور بعد ا زاں رمضان شوگر ملز کی گرفتاری ڈال دی گئی ، اسی دوران اثاثہ جات کی چھان بین شروع کر دی گئی مگر اثاثہ جات میں دوبارہ گرفتار کیا گیا ۔ انہوں نے کہا کہ شہباز شریف سواسال کی جیل کاٹ آئے ہیں، ہم نے بڑی ہمت اورحوصلے کے ساتھ حالات کا مقابلہ کیا ہے ، مگر اب عمران نیازی ملک میں غربت بیروزگاری بھوک اور معیشت کی تباہ حالی سے لوگوں کی توجہ ہٹانے کے لئے شہباز شریف کو گرفتار کرنا چاہتے ہیں،دیکھ لیا جائے کہ برطانیہ کی عدالتیں کیا کہہ رہی ہیں، لاہور ہائیکورٹ کا فل بنچ نے اثاثہ جات کیس میں کہا کہ کرپشن کا الزام تک نہیں ۔انہوں نے کہا کہ عمران نیازی او رحواری کان کھول کر سن لیں ہم نے قانونی جنگ بھرپو رطریقے سے لڑی ہے مگر آپ خود مالم جبہ سے لے کر آٹا ، چینی سکینڈل ، ادویات سکینڈل اورپبلک منی کے اربوں روپے کے سکینڈل میں ملوث ہیں، آپ سے بی آر کا جواب دیا نہیں جارہا،
فارن فنڈنگ میں آپ کے ملازموں کے اکائونٹس میں پیسے آئے ہوئے ہیں۔ انہوں نے کہا کہ اگر شہباز شریف کو گرفتار کیا گیا تو ہم بھرپور رد عمل دیں گے اور ہرگز کسی کو اجازت نہیں دی جائے گی کہ نیب یا ایف آئی اے کے تحت عمران نیازی اس طرح کے کھیل کھیلیں ،اب ان کا گھر جانے کا وقت آرہا ہے ، ہم ایک ایک پائی کا حساب لیں گے گے ،ہماری جماعت منظم ہے ،اگر کسی نے شہباز شریف کی جانب ہاتھ بھی بڑھانے کی کوشش کی توہم احتجاج بھی کریں گے اوردن کو تاریں دکھادیں گے ۔
