لاہور(این این آئی) مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ حیرت ہے اب عثمان بزدار جیسا ریموٹ کنٹرول شخص بھی اپوزیشن پر تنقید کررہا ہے،عثمان بزدار کی اپنی کوئی حیثیت نہیں وہ اپوزیشن کی حیثیت بتانے چلے ہیں۔اپنے بیا ن میں انہوں نے کہاکہ
بزدار صاحب آپکا اور کے لیڈر کا یوم حساب قریب ہے،آپ تیاری کریں آپکے خلاف آپکے ہاوس میں عدم اعتماد آئے گی آپکو لگ پتہ جائے گا،آپ کی اپنی کرسی جہانگیرترین اور پرویز الہی کی مرہون منت ہے،بزدار صاحب آپ نے تحریک عدم اعتماد کا صرف نام سنا تو حواس باختہ ہو گئے ہیں،آپ نے جتنا مال پانی جمع کرنا تھا کرلیا اب حساب کتاب کا وقت شروع ہو گیا ہے۔انہوںنے کہاکہ سب سے پہلے عمران خان اور عثمان بزدار کے نمبر آئیں گے کیونکہ سب فصلی بیٹرے فرار ہونے والے ہیں۔عمران خان ساڑھے تین سال سے جادو ٹونے اور جنتر منتر سے حکومت چلارہے ہیں۔چندے اور جنتر منتر سے حکومتیں نہیں صرف پیر خانے ہی چل سکتے ہیں۔عمران نیازی کی ڈوبتی کشتی کو بچانے کیلئے اب کوئی جادو ٹونے کام نہیں آئیں گے۔تحریک عدم اعتماد بھی آئے گی اور لانگ مارچ بھی ہوگا۔کپتان جارہا ہے،تبدیلی آرہی اور پرانا پاکستان بحال ہورہا ہے۔
