نئی دہلی(این این آئی)بھارتی اپوزیشن جماعت کے رہنما راہول گاندھی نے کہاہے کہ مودی حکومت نے مقبوضہ کشمیر اور خارجہ پالیسی میں بڑی اسٹریٹیجک غلطیاں کی ہیں، مودی کی پالیسیاں پاکستان اور چین کو قریب لے آئی ہیں، بھارت اب خطرے کی زد پر ہے۔بھارت دو حصوں
میں تقسیم ہوچکا ہے، اب ایک بھارت نہیں رہا۔ بی جے پی حکومت کورونا کا ویریئنٹ(ڈبل اے)ہے، مودی کو بھارت توڑنے کا نہیں جوڑنے کا مشورہ دیتا ہوں۔بھارتی میڈیا کے مطابق راہول گاندھی نے لوک سبھا میں خطاب کے دوران کہا کہ ایک بہت امیر افراد کا بھارت اور دوسرا غریب افراد کا ہے۔انہوں نے کہا کہ آر ایس آیس اور بی جے پی بھارت کی بنیادوں کو کمزور کررہی ہیں، دس پندرہ سال بعد بھارت کمزور ہوچکا ہوگا۔راہول گاندھی کا یہ بھی کہنا تھا کہ پچاس سالوں میں سب سے زیادہ بے روزگاری بھارت میں اس سال ہے، آج بھارت مکمل طور پر آئسولیٹ ہوچکا ہے۔ان کا کہنا تھا کہ مقبوضہ کشمیر اور خارجہ پالیسی میں بڑی اسٹریٹیجک غلطیاں کی ہیں، مودی کی پالیسیاں پاکستان اور چین کو قریب لے آئی ہیں، بھارت اب خطرے کی زد پر ہے۔راہول گاندھی نے بی جے پی حکومت کو کورونا کا ویریئنٹ(ڈبل اے)قرار دیتے ہوئے مودی کو بھارت جوڑنے کا مشورہ بھی دے ڈالا۔
