اسلام آباد (این این آئی)وفاقی دارالحکومت اسلام آبادمیں زمین کے تنازعے پر دو مختلف واقعات میں پانچ افراد قتل اورسات زخمی ہوگئے ۔پولیس ذرائع کے مطابق سرشام تھانہ بھارہ کہو کے علاقے سری چوک میں نامعلوم افراد نے راجہ ناصر نامی شخص کی گاڑی پر اس وقت اندھا دھند
فائرنگ کردی جب وہ اپنے گھر جارہے تھے، فائرنگ کے نتیجے میں راجہ ناصر، ایڈووکیٹ ہارون قدیر جبکہ ان کے دو سیکورٹی گارڈ جاں بحق ہوگئے ، گاڑی میں موجود ان کا ایک گارڈ زخمی ہوگیا، چاروں افراد کی میتوں کو ہسپتال منتقل کردیا گیا ، پولیس ذرائع کے مطابق مقتولین کا راجہ رضی نامی گروپ کے ساتھ اراضی کے تنازعے پر دشمنی چل رہی تھی جبکہ دوسرا واقعہ بھی تھانہ بھارہ کہو کے علاقہ بھوبھڑی میں پیش آیا جہاں پر زمین کی نشاندہی کے موقع پر فائرنگ سے راجہ فیاض نامی ایک شخص جاں بحق اور چھ زخمی ہوگئے دوسری جانب تھانہ بھارہ کہو کے علاقہ انگوری روڈ پر فائرنگ کے واقعہ پر آئی جی اسلام آباد محمد احسن یونس نے نوٹس لیتے ہوئے واقعہ میں ملوث ملزمان کو فوری ٹریس کر کے گرفتار کرنے کا حکم دیدیا۔ترجمان پولیس کے مطابق ابتدائی تحقیقات کے مطابق واقعہ زمین کے تنازعہ پر پیش آیا۔نانہوںنے بتایاکہ ڈیڈ باڈی اور زخمیوں کو پولیس کلینک ہسپتال منتقل کردیا گیا ہے۔ ترجمان کے مطابق ملزمان کی گرفتاری کیلئے سرچ آپریشن شروع کر دیا گیا، جلد ملزمان کو گرفتار کرلیا جائے گا۔
