کراچی(این این آئی)نیشنل اسٹیڈیم کراچی میں جاری ایچ بی ایل پی ایس ایل 7 میں دفاعی چمپئن ملتان سلطانز نے اسلام آباد یونائیٹڈ کو 20 رنز سے بآسانی شکست دے کر ٹورنامنٹ میں ناقابل شکست رہتے ہوئے مسلسل چوتھی فتح حاصل کرلی،کپتان شاداب خان کی جانب سے چوکوں اور چھکوں کی برسات بھی اسلام آباد یونائیٹڈ کو فتح نہ دلاسکی،ٹم ڈیوڈ اور رائیلی روسو کی جانب سے

حریف بالرز پر چھکوں کی برسات کے بعد خوشدل شاہ کے عمدہ بائولنگ اسپیل نے دفاعی چمپئن کی جیت میں اہم کردار ادا کیا،ٹم ڈیوڈ کو عمدہ بیٹنگ کرنے پر میچ کا بہترین کھلاڑی قرار دیا گیا۔218رنز کے تعاقب میں اسلام آباد یونائیٹڈ کی پوری ٹیم 19.4 میں 197 رنز پر ہمت ہارگئی۔ کپتان شاداب خان نے 91 رنز کی شاندار اننگز کھیلی ۔ 42 گیندوں پر 216 سے زائد کے اسٹرائیک ریٹ سے کھیلی گئی ان کی اس اننگز میں 9 چھکے اور 5 چوکے شامل تھے تاہم انہیں دوسرے اینڈ سے حوصلہ افزا اسپورٹ نہ ملی، لہذا کپتان کی یہ اننگز رائیگاں گئی۔خوشدل شاہ نے 35 رنز کے عوض 4 کھلاڑیوں کو پویلین کی راہ دکھائی۔ڈیوڈ ویلے نے تین کھلاڑیوں کوآئوٹ کیا۔ شاداب خان کے علاوہ اسلام آباد یونائیٹڈ کے ڈبل فگرز میں پہنچنے والے دیگر بیٹرز میں ایلکس ہیلز 23، پال اسٹرلنگ 19، آصف علی ، رحمان اللہ گرباز 15،15 اور اعظم خان 12رنز بنا کر آئوٹ ہوئے۔اس سے قبل ملتان سلطانز نے پہلے بیٹنگ کرتے ہوئے مقررہ بیس اوورز میں 5 وکٹوں کے نقصان پر 217 رنز بنائے تھے۔ اوپنر شان مسعود کے 43 رنز کے باوجود 78 رنز پر ابتدائی تین وکٹیں گنوانے کے بعد ٹم ڈیوڈ نے رائیلی روسو کے ہمراہ چوتھی وکٹ کے لیے 110 رنز کی شراکت قائم کرکے ملتان سلطانز کا مجموعہ 200 کے پار پہنچا دیا۔ٹم ڈیوڈ نے 29 گیندوں پر 6 چوکوں اور 6 چھکوں کی بدولت 71 رنز کی شاندار اننگز کی۔ رائیلی روسو نے 191 کے اسٹرائیک ریٹ سے ناٹ آئوٹ 67 رنز اسکور کیے۔ ان کی اننگز میں 6 چھکے اور 4 چوکے شامل تھے۔محمد وسیم، مارچنٹ ڈی لانگے اور حسن علی نے ایک ایک وکٹ حاصل کی۔ٹم ڈیوڈ کو عمدہ بیٹنگ کرنے پر میچ کا بہترین کھلاڑی قرار دیا گیا۔