لندن /واشنگٹن(این این آئی)امریکا میں کورونا وائرس کی اومیکرون قسم کے تیزی سے پھیلنے کے سبب ایک دن میں 10 لاکھ سے زائد کیسز سامنے آئے جو کہ ایک عالمی ریکارڈ ہے،ادھر یورپ بھر میں کورونا کیسز کی سب سے بڑی تعداد رپورٹ کی گئی ہے، 24 گھنٹوں میں فرانس میں 2 لاکھ 71 ہزار سے زائد کیس رپورٹ ہوئے ہیں،۔میڈیارپورٹس کے مطابق جان ہاپکنز یونیورسٹی کے جاری

کردہ اعداد و شمار میں کہاگیاکہ نئے سال کی چھٹیاں ختم ہونے کے بعد امریکا میں پیر کے روز 10 لاکھ 80 ہزار 211 مثبت کیسز سامنے آئے۔گزشتہ ہفتے امریکا کے سینٹر فار ڈیزیز کنٹرول اینڈ پری وینیشن نے علامات نہ رکھنے والے کورونا مریضوں کے لیے قرنطینہ کے دورانیے کو نصف کرکے 5 دن تک محدود کردیا تھا، تاکہ اومیکرون کی وجہ سے پیدا ہونے والے مسائل کو کم کیا جاسکے۔ادھریورپ بھر میں کورونا کیسز کی سب سے بڑی تعداد رپورٹ کی گئی ہے، 24 گھنٹوں میں فرانس میں 2 لاکھ 71 ہزار سے زائد کیس رپورٹ ہوئے ۔غیرملکی میڈیا کے مطابق اٹلی میں کورونا کے 1 لاکھ 70 ہزار سے زائد مریض سامنے آگئے ۔برطانیہ میں 24 گھنٹوں کے دوران پہلی بار 2 لاکھ سے زائد کورونا کیس رپورٹ ہوئے ہیں، گزشتہ روز 2 لاکھ 18ہزار سے زائد کیس سامنے آئے۔برطانوی وزیراعظم نے کہا کہ لوگ بوسٹر نہ لگوانے کے سبب غیر ضروری طور پر ہلاک ہورہے ہیں،آئندہ چند ہفتے چیلنجنگ ہوں گے۔بورس جانسن نے کہا کہ کورونا کے خلاف جنگ ابھی ختم نہیں ہوئی، ہر شخص اپنا کردار ادا کرے تو لاک ڈاون کی ضرورت نہیں پڑے گی۔