اسلام آباد (این این آئی)قومی کرکٹ ٹیم کے فاسٹ باؤلر اور پی ایس ایل میں اسلام آباد یونائیٹڈ کی نمائندگی کرنے والے حسن علی پریس کانفرنس کے دوران صحافی سے الجھ پڑے، ویڈیو وائرل ہوگئی ۔ گزشتہ روزحسن علی سے پریس کانفرنس کے دوران ایک صحافی انس سعید نے سوال کیا تو سوال پورا ہونے سے پہلے ہی کرکٹر

نے انہیں اگلے سوال کا کہہ دیا۔صحافی نے متعدد مرتبہ اپنا سوال دہرایا تاہم حسن علی بھی جواب نہ دینے کی ضد لگائے رہے اور جواب میں صرف ’اگلا سوال‘ کہتے رہے۔بعد ازاں فاسٹ باؤلر نے کہا کہ وہ انس سعید کے سوال کا جواب نہیں دیں گے۔ اس پر صحافی نے کہا کہ پہلے سوال پورا سن لیں پھر فیصلہ کریں کہ جواب دینا ہے یا نہیں۔اس پر حسن علی نے کہا کہ پہلے آپ ٹوئٹر پر اچھی باتیں لکھیں پھر آپ کے سوال کا جواب دوں گا۔انہوں نے اپنی بات جاری رکھتے ہوئے غصے کے عالم میں کہا کہ پی سی بی تو آپ کو روک نہیں سکتا لیکن ہمیں تو حق ہے۔دوسری جانب راولپنڈی اسلام آباد سپورٹس جرنلسٹس ایسوسی ایشن رسجا(ر) کے چئیرمین عبدالمحی شاہ ، صدر ایاز اکبر یوسفزئی ،سیکرٹری عارف محمود سمیت پوری رسجا فیملی قومی کرکٹر حسن علی کی جانب سے پی ایس ایل سیون کی ڈرافٹنگ کی پریس کانفرنس کے دوران نجی چینل کے سپورٹس جرنلسٹ انس سعید کے ساتھ ناروا رویے کے باعث شدید غم وغصے کی لہر پائی جاتی ہے اور رسجا(ر) واقعہ کی شدید الفاظ میں مذمت کرتی ہے اور حسن علی سے معافی کا مطالبہ کرتے ہیں وگرنہ رسجا حسن علی کی کوریج کا بائیکاٹ کریگی اور مناسب فورم پر اپنا احتجاج بھی ریکارڈ کروائے گی