اسلام آباد (این این آئی)اسلام آباد ہائی کورٹ نے سابق چیف جج گلگت بلتستان رانا شمیم کے خلاف مس کنڈکٹ کی کارروائی کی درخواست کیس فائل چیف جسٹس کو بھیجوانے کی ہدایت کردی ۔ پیر کو اسلام آباد ہائی کورٹ کے جسٹس طارق محمود جہانگیری نے سماعت کی ۔جسٹس طارق
محمود جہانگیری نے استفسار کیا کہ یہ معاملہ چیف جسٹس کی کورٹ میں پہلے سے زیر التوا نہیں؟ ۔ وکیل درخوراست گزار چوہدری اکرم نے کہاکہ جی بالکل چیف جسٹس کے پاس پہلے سے زیر التوا ہے۔جسٹس طارق محمود جہانگیری نے کہاکہ پھر مناسب یہی ہے یہ فائل بھی چیف جسٹس کو بھیجوا دیتے ہیں، درخواست اسلام آباد کے وکیل چوہدری محمد اکرم ایڈوکیٹ نے درخواست دائر کر رکھی ہے۔ درخواست میں کہاگیاکہ سابق چیف جج گلگلت بلتستان رانا شمیم نے بیان حلفی دے کر بطور سابق جج حلف کی خلاف ورزی کی، سابق چیف جج گلگت بلتستان رانا شمیم آرٹیکل 5 کے مرتکب ہوئے ، رانا شمیم کا جھوٹا بیان حلف اسلام آباد ہائی کورٹ کو بدنام کر رہا ہے، بیان حلفی عدلیہ اور ریاست کے خلاف لوگوں میں نفرت پیدا کر رہا ہے ۔ درخواست میں استدعا کی گئی کہ سابق چیف جج کو دی گئیں مراعات واپس لے کر قومی خزانے میں جمع کروائی جائیں ، وزارت داخلہ کو رانا شمیم کے خلاف کاروائی کا حکم دیا جائے درخواست میں سیکرٹری قانون سیکرٹری داخلہ اور سابق چیف جج گلگت بلتستان رانا شمیم کو فریق بنایاگیا ۔
