اسلام آباد (این این آئی)وفاقی وزیر سائنس اینڈ ٹیکنالوجی شبلی فراز نے الیکٹرانک ووٹنگ مشین کے معاملے میں ہیکرز کو چیلنج دیتے ہوئے کہاہے کہ ای وی ایم ہیک

کرنے والے ہیکر کو 10 لاکھ روپے انعام دیں گے۔ جمعہ کو یہاں صحافیوں سے گفتگو میں شبلی فراز نے کہا کہ ہم ہیکرز کو چیلنج کریں گے کہ وہ الیکٹرانک ووٹنگ مشین ہیک کرکے دکھائیں۔انہوں نے کہا کہ ای وی ایم ہیک کرنے والے ہیکر کو 10 لاکھ روپے انعام دیں گے۔وفاقی وزیر سائنس و ٹیکنالوجی نے کہا کہ ووٹ ڈالنے کا ای وی ایم سے آسان طریقہ ہے ہی نہیں، الیکشن کمیشن اپنے آپ کو متنازع نہ بنائے۔انہوںنے کہاکہ الیکشن کمیشن کے 27 نکات ان کے اپنے خلاف ہی چارج شیٹ ہیں، دراصل ای سی پی چاہتا ہی نہیں کہ وہ انتخابات ای وی ایم پر ہوں۔سینیٹر شبلی فراز نے کہا کہ 4 لاکھ مشینیں بنانی ہیں، ایک مشین کی قیمت70 سے75 ہزارروپے ہوگی۔انہوں نے کہا کہ الیکشن کمیشن نے ایک ویڈیو ٹوئٹر پر شیئر کرکے ڈیلیٹ کی، وہ دانستہ غلطی تھی۔