اسلام آباد(مانیٹرنگ ڈیسک، آن لائن)وفاقی دارالحکومت کے ایف نائن پارک میں 8سے 10 افراد کی طرف سے افغان جھنڈے لہرائے جانے اور نعروں کی اطلاعات پر وفاقی پولیس الرٹ ہو گئی ہے ، ڈان نیوز کے مطابق 5افراد کو شہر کے مختلف علاقوں سے حراست میں لیا

گیا ہے لیکن ان کے خلاف کوئی کیس درج نہیں کیا گیا،پولیس نے ایف نائن پارک میں ایک لڑکے سے افغان سٹیزن کارڈ برآمد کیا ہے جو افغانستان کے صوبے پکتیا سے تعلق رکھتا ہے جبکہ باقی فرار ہونے میں کامیاب ہو گئے ہیں ، دوسری جانب پاکستان نے کہا ہے کہ افغانستان میں دیرپا امن اور استحکام کا حصول اور چار دہائیوں سے جاری تنازع کا خاتمہ عالمی برادری کی مشترکہ ذمہ داری ہے۔ ہماری اجتماعی کوششیں افغانستان میں دیرپا امن ، ترقی اور خوشحالی لانے میں معاون ثابت ہوں گی۔ اپنے ایک بیان میں ترجمان دفتر خارجہ زاہد حفیظ چوہدری نے کہا ہم افغانستان میں تیزی سے بدلتی صورت حال پر گہری نظر رکھے ہوئے ہیں، پاکستان سمجھتا ہے کہ موجودہ صورت حال میں افغان قیادت مل کر کام کرے تاکہ افغانستان میں پائیدار امن اور استحکام کی راہ ہموار ہوسکے، پاکستان نے ہمیشہ افغنستان کے مسئلے کے سیاسی حل پر زور دیا ہے اور اس کے لیے ہم اپنا تعمیری کردار ادا کرتے رہیں گے۔ترجمان دفتر خارجہ نے کہا کہ ہمارے خیال میں افغانستان میں دیرپا امن اور استحکام کا حصول اور چار دہائیوں سے جاری تنازع کا خاتمہ عالمی برادری کی مشترکہ ذمہ داری ہے۔ ہم امید کرتے ہیں کہ ہماری اجتماعی کوششیں افغانستان میں دیرپا امن ، ترقی اور خوشحالی لانے میں معاون ثابت ہوں گی۔