واشنگٹن(این این آئی)امریکی محکمہ صحت سی ڈی سی نے زور دیا ہے کہ جو افراد کووڈ انیس کے مرض میں مبتلا ہو کر صحت یاب ہو چکے ہیں، وہ بھی کووڈ سے بچا ئوکا ٹیکہ ضرور لگوائیں۔ میڈیارپورٹس کے مطابق یہ بات کئی حلقوں میں گردش کر رہی تھی تاہم اب سی ڈی سی نے باقاعدہ طور پر ایک تازہ مطالعے کا حوالہ دیتے ہوئے کہا کہ ایسا کرنے سے وائرس کے خلاف قوت مدافعت بہت
زیادہ بڑھ جاتی ہے۔ سی ڈی سی کے مطابق جن علاقوں میں کورونا کی نئی اور کافی مہلک اقسام کا پھیلا جاری ہے، وہاں کووڈ سے صحت یاب ہونے جانے والے بھی ویکسین لگوائیں۔ گیلپ کے ایک حالیہ سروے کے مطابق امریکا میں ویکسین نہ لگوانے والوں کی اکثریت ان افراد پر مشتمل ہے، جو اس وائرس کا شکار ہو کر صحت یاب ہو چکے ہیں اور ان کا ماننا ہے کہ وہ اس سے محفوظ ہیں۔دوسری جانب امریکا میں اب کورونا وائرس کے یومیہ اوسطا ایک لاکھ نئے کیسز سامنے آ رہے ہیں۔ جون کے اختتام میں یومیہ اوسط گیارہ ہزار تھی، جو اب بڑھ کر ایک لاکھ سے زائد نئی انفیکشنز تک پہنچ چکی ہے۔ حکام کے مطابق وائرس بالخصوص ملک کے جنوبی حصوں میں پھیل رہا ہے اور ان افراد میں، جنہوں نے حفاظتی ٹیکے نہیں لگوائے۔ امریکا کی ستر فیصد بالغ آبادی کو کورونا سے بچائو کے ٹیکے لگ چکے ہیں۔ طبی حکام کو خدشہ ہے کہ اگر لوگوں نے ٹیکے نہیں لگوائے، تو بدلتے ہوئے موسم کے ساتھ کیسز میں مزید اضافہ ممکن ہے۔
