لاہور (آن لائن)اراکین پنجاب اسمبلی بلال فاروق تارڑاور چودھری عادل بخش چٹھہ نے مشترکہ تحریک استحقاق پنجاب اسمبلی میں پیش کی۔ تحریک کے مطابق گوجرانوالہ پولیس نے اراکین اسمبلی بلال فاروق تارڑاور چودھری عادل بخش چٹھہ کے ساتھ بدتمیز ی کی ، بدکلامی کی اور تھانے میں حبس بے جا میں رکھا اور ان کا استحقاق مجروح کیا ۔ تحریک استحقاق پر کارروائی کرتے ہوئے

اسمبلی نے تحریک کو استحقا ق کمیٹی کے سپرد کر دیا اور ایک ماہ کے اندر رپورٹ پیش کرنے کا حکم دیا ہے۔ تحریک استحقاق میں مزید کہا گیا ہے کہ 25جولائی 2021 کو آزاد جموں کشمیر (AJK) الیکشن کے حوالے سے علی پور چٹھہ پولنگ اسٹیشن پر مسلم لیگ (ن) اور پی ٹی آئی ورکرز کی لڑائی ہوئی۔ جس کے بعد پولیس نے صرف مسلم لیگ (ن) ورکرز کو گرفتار کر لیا۔ ہم نے وہاں پر ایس ایس پی انویسٹی گیشن علی شاہ جو ایس ایچ او کے کمرے میں بیٹھے تھے ، ان کے ساتھ بات کرنا چاہی کہ آپ دونوں پارٹیوں کے ورکرز کو یا تو گرفتار کریں یا ہمارے بندے جو گرفتار کئے ہیں ان کو بھی چھوڑ دیں۔ اس نے ہماری بات سننے کی بجائے ہمارے ساتھ انتہائی تلخ لہجے میں بات کی اور ڈنڈابردار پولیس فورس بلا کر ہمیں باہر نکال دیا ۔ جس کے بعد ہمََ شام تک اپنے ورکرز کی رہائی کے لیے تھانے کے باہر موجودہے۔ شام کو ایس پی صدر عبدالوہاب نے ہمیں مذاکرات کے بہانے تھانے کے اندر بلایا اور ہمیں رات بارہ بجے تک تھانے میں حبس بے جا میں رکھا۔ یہ ساری کارروائی متعلقہ سی پی او سرفراز فلکی کے ایما ء پر کی گئی ، جو ان افسران کو مسلسل ہدایات جاری کرتا رہا ۔ پولیس گردی کی انتہا ہو گئی ہے ۔ گوجرانوالہ ضلع میں تھانے سی پی او سرفراز فلکی کے ہاتھوں لاکھوں میں بکتے ہیں اور سب انسپکٹر کو لاکھوں روپے رشوت لے کر ایس ایچ او تعینات کیا جاتا ہے۔ ان حالات میں آپ انصاف کی توقع کیسے کر سکتے ہیں۔ بعدازاں اسمبلی نے کارروائی کرتے ہوئے ایک ماہ میں رپورٹ پیش کرنے کا حکم دے دیا۔