گوجرانوالہ،بہاولنگر (این این آئی)گوجرانوالہ میں بجلی سپلائی کرنے والی ہائی ٹینشن تاریں چھتروں پرگرگئیں، چھ جھلس گئے ۔ میڈیا رپورٹ کے مطابق واقعہ قلعہ دیدار سنگھ کے قریب کھیتوں میں پیش آیا جہاں شہروز نامی بیوپاری نے عید پر فروخت کرنیکے لیے چھترے پال رکھے تھے۔ذرائع کے مطابق کھیتوں میں اچانک بجلی سپلائی کرنے والی ہائی ٹینشن
تاریں ٹوٹ کرگرگئیں جس سے کرنٹ لگنے سے 6 چھترے جھلس کر ہلاک ہو گئے۔دوسری جانب عید قرباں قریب آتے ہی چھری’ ٹوکے’ مْڈیاں’ صفیں فروخت کرنیوالوں کی دکانوں پر رش دیکھنے میں آرہا ہے جبکہ تکہ’ کباب بنوانے والی بھٹیاں اور سیخوں کی فروخت بھی عروج پر ہے جبکہ جانوروں کو سجانے کیلئے مویشی منڈیوں کے قریب سجاوٹی سامان کے سٹالز بھی سجنا شروع ہوگئے ہیں بچوں کی بڑی تعداد اپنے قربانی کے جانور سجانے کیلئے ان دکانوں سے پٹے’ رسیاں’ جھانجھریں’ ہار اور دیگر سامان خریدنے میں مصروف نظر آرہے ہیں سکولوں میں تعطیلات کے باعث بچوں کی اکثریت اپنے والدین کیساتھ قربانی کے جانور پسند کرنے کیلئے مویشی منڈیوں کا رخ کرنے میں مصروف ہے۔دریں اثنا عید الاضحی کی آمد کیساتھ ہی جانوروں کے چارے کی قیمتوں میں سو گنا اضافہ کردیا گیا ہے اور جو چارہ فروخت ہورہا ہے وہ بھی انتہائی ناقص اور مضر صحت ہے، چارہ فروشوں کا کہنا ہے کہ گرمی اور حبس کی وجہ سے چارے کی
پیداوار نہ ہونے کے برابر ہے اور جو یہ چارہ آرہا ہے یہ بھی کسی غنیمت سے کم نہیں کیونکہ گرمی اور حبس کی وجہ سے چارہ مرجھا جاتا ہے، کھل اور بنولہ اور اسی طرح دیگر جانوروں کی خوراک عام شہری کی پہنچ سے دور ہے جس کی وجہ سے لوگ اپنے جانوروں کو یہ چارہ کھلانے پر مجبور ہیں جس کی وجہ سے چارہ فروشوں نے اس کے نرخوں میں سو گنا اضافہ کردیا ہے۔
