اسلام آباد (این این آئی) لاپتہ افراد سے متعلق اقوام متحدہ کے ورکنگ گروپ نے پاکستان سے متعلق لاپتہ افراد کے 93 کیسزز کو فہرست سے خارج کر دیا ہے۔ لاپتہ افراد کمیشن وزارت خارجہ کے ذریعے پاکستان سے

متعلق اقوام متحدہ کے ورکنگ گروپ میں رجسٹرڈ کیسز کے بارے میں اپنی رپورٹ جمع کراتا ہے۔ لاپتہ افراد سے متعلق ورکنگ گروپ کے 123 ویں اجلاس میں پیش کی گئی رپورٹس کی 124 ویں اجلاس میں توثیق کی گئی۔ لاپتہ افراد سے متعلق اقوام متحدہ کے ورکنگ گروپ کا اجلاس 17 سے 21 مئی کے دوران جنیوا میں ہوا جس میں ورکنگ گروپ کو بھیجی گئی معلومات کی بنیاد پر پاکستان سے متعلق 93 کیسزز کو فہرست سے خارج کر دیا۔واضح رہے کہ لاپتہ افراد سے متعلق ورکنگ گروپ کی جانب سے پاکستان کو مبینہ طور پر لاپتہ افراد کے 1266 کیسز بھیجے گئے جن میں سے 920 کو خارج کرتے ہوئے نمٹا دیا گیا ہے جبکہ 346 کیسز کی تحقیقات جاری ہیں۔ ان میں سے بعض کیسز 1980ء میں افغان مہاجرین سے متعلق ہیں جن کے مکمل پتے، موبائل نمبر اور کسی بھی دوسرے رابطے کے بارے میں معلومات دستیاب نہیں ہیں۔