اسلام آباد (آن لائن) وزیراعظم عمران خان کا آئندہ ماہ دورہ برطانیہ کا امکان ہے ۔ ذرائع کا کہنا ہے کہ وزیراعظم کو دورہ برطانیہ کی دعوت برطانوی وزیراعظم سے ٹیلیفون کال میں دی گئی ہے ۔

وزیراعظم عمران خان کو آٹھ جولائی کو ہونیوالے پاکستان انگلینڈ کے درمیان پہلے ون ڈے میچ دیکھنے کی دعوت دی گئی ہے ۔ ذرائع کا کہنا ہے کہ وزیراعظم کے ممکنہ دورہ برطانیہ کے حوالے سے شیڈیولنگ کا عمل جاری ہے۔حتمی طور پر فی الحال وزیراعظم کا دورہ برطانیہ طے نہیں ہوا۔ شیڈیولنگ کے بعد وزیراعظم کے دورہ برطانیہ کو حتمی شکل دی جا سکے گی۔ وزیراعظم ممکنہ دورہ برطانیہ میں دو طرفہ تعلقات ، تجارت پر بات چیت کریں گے، ذرائع کا کہنا ہے کہ وزیراعظم کے دورے کے دوران برطانیہ میں مقیم پاکستان کو مطلوب سیاسی شخصیات کے حوالے سے بھی بات چیت کی جائے گی، ذرائع کا کہنا ہے کہ وزیراعظم ممکنہ دورہ برطانیہ میں برطانوی وزیراعظم سے ملاقات کریں گے۔ ملاقات میں افغان امن عمل سمیت خطے کی صورتحال پر بات چیت کی جائے گی۔