کراچی (این این آئی) سندھ حکومت کراچی میں کیئے جانے والے لاک ڈاؤن مزید ایک ہفتہ بڑھانے پر غور کررہی ہے۔حکومت کی اپیل اور کوششوں کے باوجود شہر قائد کراچی میں کورونا وائرس کے کیسز میں کمی نہیں آرہی ہے، جس کے باعث سندھ حکومت لاک ڈاؤن میں توسیع پر غور کررہی ہے۔ لاک ڈاؤن مزید ایک ہفتہ بڑھائے جانے
کا امکان ہے۔ذرائع کا کہنا ہے کہ تعلیمی ادارے بھی مزید ایک ہفتے تک بند رہیں گے۔ کورونا ٹاسک فورس کے اجلاس میں حتمی فیصلہ کیا جائے گا۔ صوبائی وزیر صحت عذرا پیچوہو پہلے ہی خطرے کی طرف اشارہ دے چکی ہیں۔نیشنل کمانڈ اینڈ کنٹرول سینٹر (این سی او سی)کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 1 ہزار 923 کیسز سامنے آئے ہیں، مزید 84 افراد اس موذی وبا کے سامنے زندگی کی بازی ہار گئے، مزید 4 ہزار 380 مریض شفایاب ہو گئے، جبکہ مثبت کیسز آنے کی شرح تقریبا 4 فیصد رہی۔ملک بھر میں کورونا وائرس سے انتقال کرنے والوں کی مجموعی تعداد 21 ہزار 189 ہو گئی ہے، جبکہ کل کورونا مریضوں کی تعداد 9 لاکھ 30 ہزار 511 ہو چکی ہے۔ملک بھر میں اسپتالوں، قرنطینہ سینٹرز اور گھروں میں کورونا وائرس کے کل 48 ہزار 937 مریض زیرِ علاج ہیں، جن میں سے 3 ہزار 452 مریضوں کی حالت تشویش ناک ہے، جبکہ کل 8 لاکھ 60 ہزار 385 مریض اب تک اس بیماری سے شفایاب ہو چکے ہیں۔24 گھنٹوں میں کورونا وائرس کے مزید 50 ہزار 393 ٹیسٹ کیئے گئے، جبکہ اب تک کل 1 کروڑ 34 لاکھ 71 ہزار 172 کورونا ٹیسٹ کیئے جا چکے ہیں۔پاکستان بھر میں گزشتہ 24 گھنٹوں کے دوران 2 لاکھ 55 ہزار 6 افراد کو کورونا وائرس کی ویکسین دی گئی، جبکہ اب تک کل 82 لاکھ 63 ہزار 763 کورونا ویکسین کی خوراکیں دی جا چکی ہیں۔
