لاہور( این این آئی )صوبائی وزیر صنعت و تجارت میاں اسلم اقبال نے کہا ہے کہ وزیراعظم عمران خان نے قومی معیشت کو درست سمت پر ڈال دیا ہے۔حکومت کی معاشی میدان میں کامیابیوں سے اپوزیشن بوکھلا گئی ہے۔معاشی ترقی کی چارفیصد شرح مخالفین کے لئے ڈرانا خواب بن گئی ہے۔بہتر ہوتی ہوئی معیشت سے انتشار کی

شکاراپوزیشن کو اپنی سیاسی دکان بند ہوتی نظر آرہی ہے۔مخالفین شور مچاتے رہیں، ہم عوام کی خدمت کرتے رہیں گے۔ صوبائی وزیر صنعت و تجارت میاں اسلم اقبال نے ان خیالات کا اظہار گزشتہ شب یونین کونسل 86خلیفہ چوک میں عوامی اجتماع سے خطاب کرتے ہوئے کیا، لوگوں نے علاقے کے ترقیاتی مسائل سے آگاہ کیا۔ صوبائی وزیر نے اجتماع سے خطاب کرتے ہوئے کہا کہ نمائشی منصوبوں کی بجائے مفاد عامہ کی حقیقی سکیمیں لارہے ہیں، سڑکوں کے ساتھ تعلیم اور صحت کے ادارے بھی بنا رہے ہیں۔انہوں نے کہا کہ تعلیم کو فروغ دئیے بغیر تیز رفتار ترقی کا حصول ممکن نہیں۔سوڈیوال میں ایک ارب روپے کی لاگت سے سٹیٹ آف دی آرٹ گرلز ڈگری کالج بنائیں گے جبکہ سمن آباد گرلز کالج میں 22کروڑ کی لاگت سے آئی ٹی کا شعبہ قائم کیا جائے گا، اسی طرح سمن آباد ڈونگی گرانڈ کو ماڈل پارک بنائیں گے۔ صوبائی وزیر نے کہا کہ عوام کے ٹیکسوں کا پیسہ عوامی فلاح کے منصوبوں پر ہی خرچ ہو گا۔ انہوں نے کہا کہ نوجوانوں کو جدید علوم سے آراستہ کر کے بااختیار بنائیں گے۔عوام کی خدمت میرا اوڑھنا بچھونا ہے، آخری سانس تک عوام کی خدمت کرتا رہوں گا۔منتخب نمائندے اور صوبائی وزیر کی حیثیت سے آپ کے مسائل کا حل میری ذمہ داری ہے اور میرے دروازے ہمہ وقت عوام کے لئے کھلے ہیں۔