اسلام آباد(آن لائن ) منکرین ختم نبوت کا دفاع کرنے کے مبینہ الزام پر وفاقی وزیر اطلاعات فواد حسین چوہدری کیخلاف مقدمہ کے اندراج کیلئے ایڈووکیٹ ضیا الرحمان کی جانب سے ایس ایس پی اسلام آباد کو تحریری درخواست دے دی گئی۔ اسلام آ باد بار کے ایڈووکیٹ ضیا الرحمن نے ایس ایس پی اسلام آباد کو تحریری درخواست دیتے ہوئے موقف اختیار کیا ہے کہ عقیدہ ختم نبوت اسلام کی بنیاد ہے اور عقیدہ ختم نبوت پر یقین رکھے بغیر مسلمان ہونا ممکن نہ ہے۔

وفاقی وزیر اطلاعات فواد چوہدری نے اپنے عہدے کا ناجائز استعمال کرتے ہوئے دستور پاکستان مجریہ 1973کے تحت غیر مسلم قرار دئیے گئے منکرین ختم نبوت گروہ (قادیانیوں) کا 4۔9۔2018کو میڈیا بریفنگ میں بھرپور دفاع کیا اورمنکرین ختم نبوت کیخلاف بات کرنیوالوں کو انتہا پسند قرار دیا اس طرح اس نے تمام مسلمانوں کو انتہا پسند قرار دے کر معاشرے میں خوف و ہراس اور ہیجان کی لہر دوڑائی ہے۔ فواد چوہدری کے اس بیان سے میری اور تمام مسلمانوں کی سخت دل آزاری ہوئی ہے مذہبی جذبات کو شدید ٹھیس پہنچی ہے ، فواد چوہدری نے اس بیان سے متفقہ دستور پاکستان کا مذاق اڑایا ہے جو پاکستان میں مذہبی فسادات کروانے کی مذموم سازش بھی ہے۔ فواد چوہدری کی جانب سے میڈیا پر کی جانیوالی گفتگو کا ٹرانسکرپٹ بھی درخواست کے ساتھ لگایا گیا درخواست گزار نے استدعا کی ہے کہ فواد چوہدری نے اپنے عہدے کا ناجائز استعمال کرتے ہوئے عقیدہ ختم نبوت کے ماننے والوں کی شدید دل آزاری کی ہے اور مذہبی فسادات کروانے کی ناپاک کوشش کی لہذا فواد چوہدری کیخلاف انسداد دہشتگردی ایکٹ مجریہ 1997اور تعزیرات پاکستان کی دفعات کے مطابق مقدمہ درج کر کے سزا دلوائی جائے۔ منکرین ختم نبوت کا دفاع کرنے کے مبینہ الزام پر وفاقی وزیر اطلاعات فواد حسین چوہدری کیخلاف مقدمہ کے اندراج کیلئے ایڈووکیٹ ضیا الرحمان کی جانب سے ایس ایس پی اسلام آباد کو تحریری درخواست دے دی گئی۔