لاہور( این این آئی)گورنر پنجاب چوہدری محمد سرور کی تقریب حلف برداری میں دوہزار سے زائد مہمانوں نے شرکت کی جس کی وجہ سے کرسیاں بھی کم پڑ گئیں۔زیادہ مہمانوں کو مدعو کئے جانے کی وجہ سے تقریب گورنر ہاؤس کے گراؤنڈ میں کی گئی ۔حلف برداری کی تقریب میں وزیر اعلی پنجاب سردار عثمان بزدار،ڈی جی رینجرز پنجاب میجر جنرل اظہر نوید حیات ،سپیکر پنجاب اسمبلی پرویز الٰہی ،ڈپٹی سپیکر سردار دوست محمد مزاری ،سینئرصوبائی وزیر عبدالعلیم خان ،

صوبائی وزیر محمود الرشید ، ہمایوں اختر سمیت پارٹی کے رہنماؤں،اراکین اسمبلی اور زندگی کے مختلف شعبوں سے تعلق رکھنے والی نمایاں شخصیات نے شرکت کی ۔چوہدری محمد سرور نے پنجاب کے گورنر کی حیثیت سے حلف اٹھا لیا ۔گورنر ہاؤس لاہور میں منعقدہ تقریب میں چیف جسٹس لاہور ہائیکورٹ جسٹس محمد یاور علی نے چوہدری محمد سرور سے عہدے کا حلف لیا ۔چیف سیکرٹری پنجاب اکبر درانی نے تقرری سے متعلق نوٹیفکیشن پڑھ کر سنایا ۔ تقریب میں وزیر اعلیٰ پنجاب سردار عثمان احمد بزدار، سپیکر پنجاب اسمبلی چوہدری پرویز الٰہی،ڈپٹی سپیکر سردار دوست محمد مزاری، کابینہ کے اراکین ،لاہور ہائیکورٹ کے معزز ججز صاحبان ، اعلیٰ سول ، فوجی حکام ،صوبائی سیکرٹریز ،اراکین اسمبلی اور پارٹی رہنماؤں سمیت مختلف شعبہ ہائے زندگی سے تعلق رکھنے والی نمایاں شخصیات نے شرکت کی ۔ گورنر پنجاب کے عہدے کا حلف اٹھانے کے بعد چیف جسٹس محمد یاور علی ،وزیر اعلیٰ پنجاب ، کابینہ کے اراکین اور دیگر شرکاء نے چوہدری محمد سرور کو مبارکباد دی ۔ تقریب میں دو ہزار سے زائد مہمانوں کو مدعو کیا گیا اور وی آئی پی موومنٹ کی وجہ سے مال روڈ کی ایک شاہراہ کو عام ٹریفک کیلئے بند رکھا گیا ۔ مہمانوں کی تواضع چائے اور بسکٹس سے کی گئی ۔ علاوہ ازیں گورنر پنجاب چوہدری محمد سرور نے 6ستمبر یوم دفاع کے موقع پر

اپنے پیغام میں کہاکہ یہ دن ہماری تاریخ کا روشن باب ہے جس نے پوری قوم کو نیا عزم اور اتحاددیا۔ پاکستانی قوم نے اپنی جری ، غیور اور دلیر فوج کے شانہ بشانہ کھڑے ہوکر ملک کی سالمیت اور حرمت کے لئے شجاعت اور بہادری کی وہ داستان رقم کی جس کی بازگشت آج بھی تاریخ کے ایوان میں گونج رہی ہے ۔ گورنر پنجاب نے کہاکہ شہداء کی بدولت آج آزاد اور با وقار ملک میں سانس لے رہے ہیں ۔