لاہور( این این آئی)صوبائی وزیر اطلاعات و نشریات فیاض الحسن چوہان نے کہا ہے کہ وزیر اعظم ہاؤس سے شروع ہونے والی سادگی اور کفایت شعاری کی روایت کی وزیر اعلیٰ ہاؤس میں بھی پیروی کی گئی ہے ۔ ڈی جی پی آر میں میڈیا کو بریفنگ دیتے ہوئے

وزیر اطلاعات نے کہا کہ کابینہ کااجلاس گیارہ بجے شروع ہوا اور ساڑھے تین بجے تک جاری رہا ۔ اجلاس کے شرکاء کی چائے اور بسکٹس کے علاوہ کسی اور چیز سے تواضع نہیں کی گئی ۔ انہوں نے کہا کہ یہاں آ کر ڈھابے سے دال اور سبزی منگوا کر کھانا کھایا ہے ۔ وزیراعلیٰ پنجاب سردار عثمان بزدارکی زیر صدارت پنجاب کابینہ کاپہلا اجلاس تقریبا ساڑھے تین گھنٹے جاری رہا ۔ پنجاب کا بینہ کا پہلا اجلاس سادگی اور کفایت شعاری کا آئینہ دار تھا ۔ اجلاس کے شرکاء کو صرف چائے اور بسکٹ پیش کئے گئے۔ اجلاس کا آغاز تلاوت قرآن پاک سے ہوا اور نماز جمعہ کیلئے 30 منٹ کا وقفہ کیا گیا۔ وزیر اعلیٰ اور صوبائی وزراء نے وزیر اعلی آفس کی مسجد میں نماز جمعہ ادا کی ۔اجلاس کے دوران سینئر وزیر عبدالعلیم خان اور دیگر وزراء نے وزارت اعلیٰ کے منصب سنبھالنے پر سردار عثمان بزدار کو مبارکباد دی اور ملکر ساتھ چلنے کے عزم کا اظہار کیا۔ کابینہ کے اراکین نے کہا کہ آپ کی کامیابی عمران خان کی کامیابی ہے اور ہم صوبے کی ترقی اور عوام کی خوشحالی کیلئے قدم سے قدم ملا کر چلیں گے ۔